Bontši bja basetsana ba palelwa ke go ya dikolong ka nako ya letlhapo. Go fetola se, molaodi
wa In Touch Community Development, Kganya Ramoshaba-Bbenkele o bone tlhokego ya go
dira se sengwe go thuša makgarebe gore a kgone go ya sekolong.
Kganya o re o thomile leano moo a sepelago a kgoboketša mengatwana ya letlhapo yeo a e
abelago basetsana bao ba hlakago. Mabapi le se, o ipiletša go batho gore ba kgethe maina a
dikolo tšeo barutwana ba hlokago mengatwana mme o ile go ba abela ge maina a hweditšwe.
O re o hlohleleditšwe ke dipoelo tša barutwana ba marematlou a 2024 gore a thuše basetsana
go tšwela pele go tsena dikolo gore ba fihlelele bokgoni bja bona. Nepo ke go matlafatša
basetsana gore ba se fetwe ke dithuto nakong ya letlhapo ka lebaka la tlhokego ya
mengatwana.
“Re kwešiša seemo sa ekonomi seo naga e lego go sona ka gore bontši bja batho bo palelwa
ke go reka dinyakwa tše bohlokwa tša go swana le mengatwana,” a realo.
Lenaneo le le hlohleleditšwe gape ke tlhokego ya ka pela ya go šetšana le mathata a letlhapo
go basetsana bao ba dulago metsemagaeng le go netefatša gore ga go na mosetsana yo a
palelwago ke go ya sekolong ka lebaka la letlhapo. O re o nyaka go bona serithi go basetsana.
“Basetsana ba swanetše go sepela ka boitshepo, ba tshwenyege feela ka go hwetša dipoelo tša
godimo dithutong,” a realo.
Kganya o re go na le tlhokego ya go lemoga bohlokwa bja hlweko ya maleba ya letlhapo,
kudu go bahlaki bao ba palelwago ke go hwetša dinyakwa tša bona.
“Bao ba tlago go holega ke barutwana, basadi ba metsemagaeng le bahlaki ka kakaretšo bao
ba palelwago ke go hwetša mengatwana,” a realo.
O re o ipiletša go setšhaba, batswadi le batšeakarolo go thuša ka go kgetha dikolo tšeo di tla
thušegago ka go hwetša mengatwana.
“Bao ba nyakago go abelwa mengatwana le bao ba nyakago go kgetha dikolo goba go thuša
ba ka re letšetša go 015 297 4511/12,” gwa realo Kganya ge a kgopela.
