Mmegi Wa Seipone
POLOKWANE: Ka Mošupologo wa 17 Dibokwane (Febereware) 2025, Kgoro ya Dipapadi, Bokgabo
le Setšo, ka tirišano le Ofisi ya Tonakgolo le Kgoro ya Tlhabollo ya Leago, di swere
moletlwana wa go laelana le batšofadi lepatlelong la Peter Mokaba. Batšofadi ba ba tšere
leeto la go ya Rustenburg fao ba yago go phenkgišana le diprofense tše dingwe ka dipapadi
tša go fapafapana bjalo ka karolo ya Lenaneo la Bosetšhaba la Batšofadi ba Mafolofolo.
Sehlopha se se tla ba se emetše profense ya Limpopo go Batšofadi ba Mafolofolo.
“Nepo ya mušo ke go hlola setšhaba sa batho bao ba phetšego gabotse, ba go fola mebeleng
le menaganong. Mmušo o dumela gore go na le malwetši ao a ka thibelwago goba a fokotšwa
ka ntle ga go diriša tšhelete eupša ka go šidulla mebele ya rena. Bontši bja batho ba
mengwaga ya go lekana le ya lena, ba keta tsela ya go ya dipetlela ka lebaka la malwetši a go
fapafapana. Bontši bja malwetši ao a tshwenyago batho a ka thibelwa ka go itšhidula ka
mokgwa wa go bina goba go bapala dipapadi tša mehutahuta bjalo ka kgwele ya maoto, go
kitima, go sepela ka go phakiša le dipapadi tše dingwe. Ge palo ya batho bao ba itšhidullago
e ka oketšega, re nagana gore palo ya batho bao ba yago dipetlela ka malwetši a go
fapafapana e tla fokotšega. Go itšhidulla ke sehlare sa go se lefelwe sa go thibela malwetši a
mehutahuta,” gwa realo Ngk. Martin Sehlapelo, yo e e lego Hlogo ya Motšwaoeja ya Kgoro
ya Tlhabollo ya Leago, nakong ya ge a laelana le batšofadi.
“Bjalo ka mmušo, re na le leano leo le otlologilego gabotse la go bopa setšhaba sa batšofadi
bao ba phetšego gabotse, ba go fola mebeleng le gona ba mafolofolo. Re nyaka go aga setšo
sa go hlokomela mebele ya rena ka go amega go ditiragalo tša go fapafapana – go opela le go
bina, mabelo, go sepela, go bapala kgwele ya maoto le dipapadi tše dingwe. Go emaema ka
go bapala dipapadi, ke go šidulla mmele, go thobolla mešifa le go thuša madi go sepela
gabotse. Se se thuša go thibela malwetši le go lwantšha ao a lego gona. Gape ge batho ba
bapala, ba gahlana le batho ba bangwe fao ba dirago sekgotse le go tsebana le batho bao.
Dipapapadi di tlišetša batho ba bantši lethabo le boipshino tšeo di dirago gore ba kwe ba
iketlile bophelong. Re nyaka go bona batšofadi ba bantši ba amega ka mafolofolo go dipapadi
le ditiragalo tše dingwe setšhabeng,” gwa realo Molekgotlaphethiši wa Dipapadi, Bokgabo le
Setšo, Mna Jerry Maseko, nakong ge a laelana le batšofadi.
“Bjalo ka batšofadi, le bone dilo tše dintši mo lefaseng … le gahlane le dilo tša go fapafapana,
le ithutile dilo tše dintši tšeo di le filego tsebo, boitemogelo le bohlale. Ke lena dišego le
didiba tša tsebo ya fao re tšwago kua morago le seo re lego sona bjalo ka batho. Bjalo ka
batho ba baswa, re nyanya mo go lena … re ithuta go tšwa go lena ka gore segagaborena se re
mahlaku a maswa a ithekga ka a matala. Le dišego tša rena tša tsebo ya bohwa bja rena …
meetlo, ditlwaelo le mekgwa ya phedišano magareng ga batho. Ke ka lebaka leo re tla
phelago re le thekga, re le thuša, re le hlompha le go le matlafatša ka gore go hlompha lena,
ke go itlhompha, go matlafatša lena, ke go imatlafatša.
“Limpopo le tumile go go gogola difoka. Le lena eyang go gogola difoka ka mafolofolo le
bowe le tšona mo gae. Re re mahlatse le mahlogonolo go lena. Ka lebaka la gore le tšwa ka
difate fao le yago go emela profense, re le swaretše dimpho tša diaparo tša go swana gore ge
le fihla, le bonagale le lena le kgone go bonana le go tsebana ka diaparo tša lena,” Maseko a
realo a felegetšwa ke legowa ge a abela batšofadi bao diaparo tšeo di akaretšago diterekesutu,
diaparo tša go ngangega (tights) le marokgwana a go bapala.
