POLOKWANE: Polelo e re le ge o ka e buela leopeng, magokobu a go bona. Gantši ge
motho a dira dilo tša go se nyakege, o a iphihla e le ge a direla gore a se ke a bonwa, mediro
ya gagwe ya tšwela nyanyeng. Ge o le gare o e buela leopeng, Kgoro ya Maphodisa mo
Limpopo e re legokubu la yona la theknolotši e lego ‘drone’, e go lebeletše.
Kgabagareng ya go lwantšha bosenyi bja go epa mo go sego molaong ka ge bontši bja
ditiragalo tše bo direga mafelong a go iphihla, ga go be bonolo gore maphodisa a ka fihla.
Sergeant Morekwana Monyela ke ‘Drone Pilot’ (mofofiši/mootledi wa drone) o tliša phapano
e kgolo lesolong la ‘Vala Umgodi’ mo Limpopo.
Sergeant Maphure Manamela wa senthara ya boraditaba ka sephodiseng ya Limpopo o re:
“Monyela ke lephodisa ka Kgorong ya Maphodisa (SAPS) ya Limpopo yo a ikgafetšego
mošomong wa gagwe wa go šomela setšhaba. Gabjale o ka sehlopheng sa SAPS Limpopo
Airwing fao a šomago bjalo ka mogapeletši wa molao (law enforcement officer) le go ba
Mootledi wa Drone sehlopheng sa Vala Umgodi. Bokgoni bja gagwe bo thuša kudu
kgabagareng ya go lwantšhana le bosenyi, go kgobokanya bohlatse le go netefatša polokego
ya setšhaba,” a realo.
Manamela o tšwetše pele ka go re leeto la Monyela mo sephodiseng le thomile ka 14
Phupu/Julae 2008 ka morago ga go fetša dithuto tša sephodisa mo Tshwane Police Academy.
Lerato la gagwe mo sephodiseng le dirile gore a tšwetše tsebo ya gagwe pele ka go dira
tlhahlo ya go ikgetha ya ALEO le Drone Pilot fao a itaeditšego go ba a na le bokgoni kudu le
go itokišetša ditlhotlo tša lefaufaung.
Ge a bolela ka mohola wa yona o re “Tšhomišo ya drone e dira mošomo gore o be bonolo. E
re thuša masolong a rena a go nyaka le go hlakodiša le go nyakana le batho ba go timela. E re
thuša kudu nakong ye ya dipula tše dišoro ka ge re kgona go nyaka batho ba go gogolwa ke
meetse. Ka thušo ya Monyela, re kgonne go atlega masolong a go nyaka batho mafelong a
mašoro a go se tsenwe bonolo,” a realo.
O re gabjale drone e kgonne go ba thuša go swara bagononelwa ba 4 ka morago ga go utolla
laborathori yeo e sego molaong ya go hlatswa gauta ka di 8 Dibokwane 2025 seleteng sa
Mopani.
Ka ge go se na le yo a lego ka godimo ga molao, Manamela o re: “Ka ge Monyela a na le
laesense ya go šomiša drone, o hlahlilwe ka melawana ka moka yeo a tla e šomiša go ya ka
melawana ya Civil Aviation Authority (CAA), yeo ge o ka e tshela, o ka lebanago le molao.
