POLOKWANE: Dikgoba tša borutiši le tša bolaodi tšeo di sa tlatšwego di šitiša thuto le go
rutwa ga barutwana mme tše palediša dikolo go tšwelela gabotse. Mokgatlo wa Democratic
Alliance (DA) mo Limpopo o ipiletša go Kgoro ya Thuto gore e šogane le go tlatša dikgoba
tšeo di hlokago bašomi profenseng ka bophara.
Mmoleledi wa tša thuto mokgatlong wa DA, Jacques Smalle, o re makgolokgolo a dikgoba
tša mešomo ka kgorong di ile go šaetša barutwana mme ba palelwa ke go hwetša thuto ya
maleba.
“Kgoro e na le dikgoba tše 167 tša dihlogo tša dikolo, dikgoba tše 536 tša batlatšadihlogo ba
dikolo (deputy principals), tše 177 tša dihlogo tša mafapa le dikgoba tše 203 tša barutiši,” a
realo.
Smalle o re ba ipiletša go Molekgotlaphethiši Mavhungu Lerule-Ramakhanya gore a tlatše
dikgoba tšeo ka pela. Ka ntle le go dira bjalo, go tla hlolega tlhakahlakano dikolong mme
barutwana ba se tšwelele gabotse mafelelong a ngwaga.
“Go palelwa ke go tlatša dikgoba tšeo go ile go laetša boetapele bja maemo a fase gammogo
le dikolo tša go se tšweletše dipoelo tša go kgahliša,” a realo.
O re go palelwa ga Kgoro go tlatša dikgoba tšeo tše bohlokwa, go ile go gwahlafatša go ruta
le go ithuta ga barutwana mme gwa tlogela profense yeo e hlokago barutiši bao ba lekanego
ka nako yeo e lego gore bontši bja dikolo bo na le pitlagano ya barutwana.
“Seemo sa dikgoba tša mošomo tša Kgoro di be di eme go 7.1% ka kgwedi ya Dibatsela
Le ge e le gore palo ye e theogetše tlase gannyane ge re bala le dikgoba tša
lebakanyana (temporary posts) le tša go swarelwa (acting appointments), seemo se ga se
amogelege,” a realo.
- Smalle o re ba nyaka dikgoba tše di tlatšwa ka ponyo ya leihlo.
Mmoleledi wa Kgoro ya Thuto, Matome Taueatsoala, o re dipalopalo tšeo DA e di
šomišitšego ke tša Dibatsela 2024 mme ba be ba dutše ba tlatša dikgoba tšeo. - “Mešomo ya bašomi yeo e begilwego ka kgwedi ya Pherekgong 2024 ke ye 89 ya dihlogo tša
dikolo, 59 ya batlatšadihlogo tša dikolo le 267 tša dihlogo tša mafapa,” a realo. Taueatsoala o
re ba tšwela pele go lekola dikgoba tšeo di šetšego.
