MMEGI WA SEIPONE
MANKWENG, Yunibesithi ya Limpopo: Fao e lego gona, holo ya R-40 Yunibesithing ya Limpopo e
swanetše go ba e sa myemyela ka boipshino ge e nagana moletlo wo o swaretšwego ka go
yona ka Mokibelo wa 14 Lewedi 2024. Batlamoletlong e be e le balaodibagolo ba makala a
bokgobapuku le la dipapatšo, bafahloši ba maleme, bangwadi, maloko a setšhaba le palo ya
go hlalefa ya baithuti. Wo e be e le moletlo wa mathomo wa moswananoši wo košakgolo ya
wona e bego e le leleme (polelo), mantšu le go ngwala – Moletlo wa Dipuku (Book Festival)!
Le ge ‘Sekgowa’ se be se fela se rotoša hlogwana ya sona ya go swana le lofo ya borotho,
moletlo o be o swerwe ka motswako wa melodi ya maleme a Aforika – Sesotho sa Leboa /
Sepedi, Xitsonga le Tshivenda. Khwaere ya dithakga ya kereke ya ZCC e be e fela e
šegofatša batlamoletlong ka mmino wa go tšwa dikodung tša dithaga.
‘Batho ke bona maleme ao ba a bolelago … batho ke bona maleme a bona! Motho le leleme
leo a le bolelago la letswele ga se dilo tše pedi tšeo di aroganego eupša selo se tee seo se
kgomaganego ebile se ka se kgonegego go aroganywa. Leleme ka noši ga le na mmele, hlogo
goba molomo wa go le bolela – baboledi ba leleme ke bona ba fao leleme mebele le melomo
ya go le bolela. Ka go le bolela, batho ba bopa leleme leo le ba thušago go tšweletša
dikakanyo, dikgopolo le maikutlo a bona go batho ba bangwe. Batho ke bona beng ba
maleme a letswele ao ba a bolelago. Ge leleme la batho le bonwa bjalo ka la go se re selo, la
bompara le la go šalela morago, ga se leleme ka noši leo le sa rego selo, la bompara goba la
go šalela morago eupša baboledi le beng la leleme leo ke bona ba sa rego selo, ba dimpara le
ba go šalela morago ka gore batho ke bona maleme a bona,’ tšeo ke tše dingwe tša tšeo
batlamoletlong ba di kwelego.
‘Theknolotši ya dikgokagano e re fa menyetla e mentši ya go aga, go hlabolla le go godiša
maleme a gaborena. Ka lebaka la theknolotši ye, mang le mang yo a nago le taba yeo a ratago
go e botša batho, a ka ngwala a ba botša yona. Se se ra gore mang goba mang a ka kgona go
ba mongwadi yo a ka ngwalago ditaba tša gagwe, mohlomongwe a ba a di rekišetša batho ba
bangwe ka ntle le ditšhitišo. Gape theknolotši ya dikgokagano e dira gore go be bonolo gore
batho ba ka kgona go ruta batho ba bangwe go dira goba go tšweletša dilo bjalo ka kgwebo.
Ka lona lebaka la gore go bonolo go romela tshedimošo mo le mola ka thušo ya theknolotši
ya dikgokagano, yona taba yeo e okeditše bohodu bja tsebo le tshedimošo. O tšweletša selo
sa theknolotši mamohla ka kholofelo ya gore o tla dira mašeleng fela kae … gosasa ge o re
phaphara, yo mongwe o šetše a utswitše kgopolo yela ya gago, a gomareditše leina la gagwe
gomme bjale mašeleng a dirwa ke yena esego wena mong wa kgopolo. Hle, a re dirišeng
theknolotši go bopa, go hlabolla, go rutana le go phagamiša maleme a rena ka go a diriša ge
re diriša theknolotši,’ yeo e bile taba e nngwe yeo ba e kwelego.
Batlamoletlong ba kwele gore, bjalo ka baboledi le beng ba maleme a rena, ke boikarabelo
bja rena ka moka go bopa, go hlabolla le go phagamiša maleme a rena ka ge re le beng ba
wona. Ka go bopa, go hlabolla le go phagamiša maleme a rena, ga se maleme a rena ka noši
eupša rena bjalo ka beng le baboledi ba leleme bao re ipopago, re itlhabollang le go
iphagamiša ka gore ke rena maleme a rena.
Fela go na le tshepo … palo ya go hlalefa ya baithuti ke bangwadi bao ba phatlaladitšego
dipuku!
