MOGALE SEKWELA
POLOKWANE: Go be go tletše lethabo le manyami ge bašomi ba be ba laelana le molaodi wa bona, Gilbert Matlala (65), nakong ya ge a eya maikhutšong a go rola mošomo (retirement). Se e be e le nakong ya ge ba mo diretše moletlo wa go mo laela lepatlelong la New Peter Mokaba ka Labone, 5 Lewedi 2024.
Matlala, go tšwa GaMatlala ka ntle ga Polokwane, e be e le molaodi wa lekala la Tlhokomelo ya Thoto (facility maintenance) masepaleng wa Polokwane moo a šomilego mengwaga ye 11.
Bašomi ka yena ba re ba nyamile go mmona a sepela ka ge e be e se mošomi ka bona efela e le motswadi go bona. Ba re ba bone go swanela gore ba rulaganye moletlo wo go šupa ditebogo tša bona go yena.
Calvin Mothapo o re Matlala o be a ba swere ka go lekana. “O be a kgona go go tšeya seemong se sengwe mme a go iše go se sengwe, a go laetše gore o ka kgona. O na le bokgoni bjo bontši ebile o be a re hlohleletša gore re dumele go rena. O dirile gore yo mongwe le yo mongwe a ikwe a amogelegile mošomong,” a realo.
Ba re le ge e le gore ba nyamile go mmona a sepela, ba mo lakaletša tše botse maikhutšong a gagwe. Eddie Maleka o re o thabišwa ke gore Matlala o tlogela lekala leo le šomago ka botswerere.
“Masepala o leboga Matlala ka boikgafo bja gagwe mošomong mengwageng ye 11. Ofisi ya gagwe e be e dula e butšwe mme a swere bašomi ka moka ka go lekana. Le ge a sepela, re ikhomotša ka gore o rutile bontši bja bašomi bao ba tla tšwelago pele moo a fihlilego gona,” gwa realo Maleka.
Ba mo abetše dimpho tša mehutahuta go laetša ditebogo tša bona ka ge a kgwathile dipelo tša bona ka mekgwa ya go fapana. Matlala o re o kgwathegile gomme o be a sa letela moletlo wa borutho wa go mo laela.
“Se se laetša gore ba hlompha le go leboga go ba gona ga ka mo masepaleng. Se se šupa gape gore ke kgwathile maphelo a bona mme ke a ikgantšha go hwetša sebaka sa go šoma le bona,” a realo.
O re o thomile go šoma masepaleng wo ka ngwaga wa 2013 go tšwa masepaleng wa Aganang. “Ke thomile go šoma ka lekaleng la Theko ya Dinyakwa (supply chain), ka ya go la ditšhelete go fihla ke šutišetšwa lekaleng le la Tlhokomelo ya Thoto,” a realo.
