MOGALE SEKWELA
SESHEGO: Meyaraphethiš wa Masepala wa Polokwane, Makoro Mpe, o dumela gore
tlhokego ya meetse e hlolwa ke dihlopha tša go gweba ka meetse. Mpe o be a bolela nakong
ya ge a etetše letamo la Seshego ka ntle ga Polokwane ka Labohlano la 4 Diphalane 2024. Se
se tla ka morago ga gore lefelo la go hlwekiša meetse la Seshego le emišwe gore go dirwe
ditokišo.
Ketelo ya gagwe e tla ka morago ga boipelaetšo ka badudi ba Seshego ka Labone la 3
Diphalane kgahlanong le tlhokego ya meetse, ditefelo tša godimo le go timelwa mohlagase.
Mpe o makaditšwe ke go hwetša gore letamo la Seshego le sentšwe moo moago wa go fetiša
meetse go ya go setiši sa go a hlwekiša o thibilwego ka dikgerekgere ke badudi. O dumela
gore letamo le le senywa ke dihlopha tša go gweba ka meetse ka ge di holega ka go rekišetša
badudi meetse nakong ya tlhokego ya meetse.
“Re na le dihlopha tša go aba meets – ke batho bao ba holegago ge go se na meetse. Ba ke
batho bao ba rekišago meetse. Batho ba ba senya meago ya rena ya meetse ka boomo gore ba
kgone go tšwela pele ba rekišetša badudi meetse,” a realo.
Magareng ga dikgerekgere tšeo di hweditšwego ke maswika, maotwana a sefatanaga, ditšhipi
gammogo le dikolo tša sethunya. “Meetse a ka se fetošwe go ba kgwebo. Re ile go dira ka
moo re ka kgonago go netefatša gore badudi ba hwetša meetse go tšwa go methopo ya rena,”
a realo.
O re Kgoro ya Meetse le Kelelatšhila e thwetše batho gore ba thibulle moago woo gore
meetse a kgone go fetela ka setišing sa go a hlwekiša.
dikgerekgere
Mmoleledi wa maphodisa, Colonel Malesela Ledwaba, o re bašomi ba be ba šoma letamong
nakong ya ge ba hwetša dikgapetlana (magazine) tše pedi tša sethunya tšeo di bego di se na
selo, sellathekeng sa go senyega le dikolo.
“Dilo tšeo di ngwadišitšwe bjalo ka dilo tšwa go hwetšwa mme di ile go senywa ka morago
ga dinyakišišo. Ga go na molato wo o butšwego,” a realo.
