IKAGENG MOROASWI
MANKWENG: Molekgotlaphetiši (MEC) wa Kgoro ya Thuto mo Limpopo, Mme Mavhungu
Lerule-Ramakhanya o thabišitšwe ke tiragatšo ye e ikgethegilego ya dikolo tša Limpopo thutong
ya diroboto le go khouta. Barutwana go tšwa Sekolong sa Tlase sa Mashupye Tladi ba thopile
sefoka phadišanong ya go khouta le diroboto. Se se laetša mabokgoni a bona a boitlhamelo le
boikgafo bja bona go theknolotši. Katlego ye ke karolo ya mokgwa wo o golago profenseng,
moo dikolo di lebišago tlhokomelo kudu go ruteng dithuto tša thutamahlale, theknolotši,
boentšeneere le dipalo (STEM).
Dikolo tše dintši mo Limpopo di tsenya thuto ya diroboto le go khouta ka go mananeo a tšona a
dithuto go matlafatša barutwana ka mabokgoni a bohlokwa bakeng sa mehla ya titšithale.
Maitekelo a mmušo wa profense a go akaretša le lenaneothuto la diroboto le go khouta leo le
tšweleditšwego ke Kgoro ya Thuto ya Motheo, ikemišeditše go lokišeletša barutwana bokamoso
bjo bo laolwago ke theknolotši. A ke mananeo a mangwe ao a hlametšwego go godiša bokgoni
bja go hlama, Limpopo e bula tsela bakeng sa moloko wa bahlami le boramahlale ba ka moso.
MEC Lerule-Ramakhanya o laeditše maikutlo a lethabo ka katlego ye. O re: “Ke thabile kudu go
bona dikatlego tšeo di oketšegago tše di tlišitšwego ke barutwana ba rena profenseng. Ye ga se
feela phenyo ya dikolo tša bona eupša se ke phenyo ya barutwana ba profense ya rena”. O
fetišeditše ditebogo go tšwa pelong go ya go barutwana bao ba thopilego sefoka, barutiši,
batswadi le bakgathatema ka moka ka gore phihlelelo ye e bile gona ka lebaka la boitapišo bja
bona ka moka.
Diphenyo tše ka go diroboto le go khouta di laetša feela boikgafo bja barutwana le barutiši,
eupša gape di laetša boikgafo go thuto ya maemo a godimo mo Limpopo. Ka ge re phela
lefaseng la theknolotši, barutwana ba eleditšwe gore ba tšeye karolo mererong ye le tše dingwe.
Katlego ya barutwana ba Limpopo dithutong tše e laetša gore profense e tseleng ya go matlafatša
baswa ba yona ka mabokgoni ao a nyakegago go atlega ya bokamoso bja theknolotši ya godimo.
