IKAGENG MOROASWI
GAMPHAHLELE, Mashite: Mosadi le bana ba gagwe ba babedi ba kitimišeditšwe
bookelong bja Lebowakgomo ka morago ga go welwa ke leboto la legae la bona. Se se
diragetše mathapama a 28 Diphalane 2024 nakong ya ge phefo e šoro le pula ya sefako di
tšeya tlhaka ya ntlo ya bona le go wiša leboto.
Meladi Mphahlele, yo a amegilwego o šoro, o hlalošitše tiragalo ye bjalo ka ya masetlapelo,
“Phefo ge e thoma go tšutla, ke lekile go tswalela mafasetere efela ka ge e be e le e šoro, e ile
ya thuba a ka bosobelatšatši ya tsena ka ntlong. Ke lekile go tšhabela ka phapošing ye nngwe
le bana efela ya ba motšhabapula-motšhabela-matlorotlorong. Ke lekile go ba khurupetša ka
lepai efela ra kgeregelwa ke lebota, digalase le diripana tša masenke tša re gobatša. Moya o
rile go fokotšega, ra hlaba mokgoši, baagišane ba re thuša go tšwa ka fao. Moagišane o
ikgafile go re felegetša bookelong ka koloi ya gagwe e thubegile. Gabjale nka se re ke na le
eng … re lahlegetšwe ke diphahlo ka moka! Se e bile tiragalo ya motsotso,” a realo a laetša
go kwa bohloko.
Letšatšing la go latela la tiragalo ye ya go tšhoša badudi, Molekgotlaphethiši wa Pušotirišano,
Bodulo le Merero ya Setšo (CoGHSTA), Mna Basikopo Makamu gammogo le
sehlophatšhomo sa Taolo ya Masetlapelo sa tikologo ya Masepala wa Capricorn le Masepala
wa Selegae wa Lepelle- Nkumpi, se etetše lefelo leo.
Makamu o re “Ditikologo ka moka tša mo profenseng di amilwe ke phefo ye e šoro le pula ya
sefako. Fela seo ke se bonego mo GaMphahlele fao malapa a go iša go 200 a senyegetšwego,
go tloga go amilwe kudu ke masetlapelo. Re bone magae, dikolo, mathale a mohlagase le
maruo le tše dingwe di amegile,” a realo.
“Re kgopela badudi gore ba beye polokego ya maphelo a bona pele, ba leke go tloga
mafelong ao a lego tlasana go ya go a godimonyana go efoga go gogolwa ke meetse le phefo
ya go senya. Gape batho ba efoge go tshela dinoka nakong ye ka ge ba beya maphelo a bona
kotsing. Ke rata go tšeya monyetla o ke lle le bao ba amegilego le gore bao ba gobetšego ba
fole ka pela,” a realo.
Ba lapa ba filwe tente ya go pipa lebota ka godimo lebakanyana, mapai, dilo tša go hlapa, ba
tshepišitšwe gore ba tla direlwa legae la lebakanyana. Efela sehlopa se etetše a mangwe
malapa le metsana ya kgauswi go lekola tshenyo.
CoGHSTA e kgonthišiša gore e tla šoma le dikgoro tše dingwe go swana le tša Tlhabollo ya
Leago le Eskom go netefatša gore batho ba na le mo ba ka fihlago hlogo, ba robala ba jele le
go ba le mohlagase le tše dingwe tšeo ba ka di hlokago.
Ka ge malapa a sa lekane, badudi ba dira boipiletšo go motho mang kapa mang gore a thuše
ka se a ka se kgonago go swana le diputhelwana tša dijo, mapai, dilo tša go hlapa, diaparo
dilo tša go aga le ge e le marobalo a lebakanyana jalo ka mekhukhu le ditente.
