Gabjale modulasetulo wa sehlopha sa go lwantšhana le bosenyi le diokobatši sa Seshego
Community Against Crime And Gangsterism (SCACAG), Vincent Kunutu, o re ba ipiletša
go Masepala wa Polokwane gore o tloše bjang gore go se be le bokhuto… dilo di be kgakala.
Gape o ipileditše go maphodisa gore a hlokomele mmila wo ka go fetafeta go wona nako le
nako.
Se se tla ka morago ga gore badudi ba bane ba hlaselwe ke bagononelwa ba bararo bao ba
bego ba itlhamile ka sethunya matšatšing a mmalwa a go feta. Kunutu o re badudi ba bararo
ba be ba itšhidulla nakong ya ge ba hlaselwa.
“Yo mongwe wa bona o thuntšhitšwe efela ka mahlatse kolo ga se e mo hwetše. Modudi wa
bone o thušitšwe ke ampulense yeo e bego e letša saerine sa tšhoganetšo. Ke dumela gore ba
be ba nagana gore ke saerine ya maphodisa,” a realo.
O re bontši bja badudi ba hlasetšwe mmileng wo bekeng tše mmalwa tša go feta. Tiragalo ye
šoro e bile ka kgwedi ya Dibokwane 2023 ge banna ba tshela ba hlasela le go hula basadi ba
babedi, ba phaya yo tee thetho ka kgang mme ba hlasela le go bolaya monna yo tee magareng
ga ba babedi bao ba emego ka sefatanaga ka maikemišetšo a go thuša basadi ba.
“Gonabjale badudi ba boifa go sepela mmileng wo ka lebaka la mahlakale bjang bjo. Re
kgopela batswadi gore ba tlogele go romela bana ba bona mafelong ao a tla ba gapeletšago
gore ba šomiše mmila wo ka maoto ba le tee. Batswadi ba swanetše go felesetša bana ba bona
sekolong. Batšofadi bona ba swanetše go tlogela go šomiša mmila wo ge ba sepela ka maoto
ka gore mahodu ao a gare a kitima le naga ka dibetša,” a realo ka maswabi.
Badudi ba boifela maphelo a bona. “Mahodu a a dula a ikemišeditše go hlasela mme a nyaka
tšhologo ya madi. Re ka gare ga mathata,” gwa realo Kamogelo Letsoalo (31).
Mmoleledi wa Masepala wa Polokwane, Thipa Selala, o re ba ile go netefatša gore ba fokotša
mahlaka le bjang bjoo kgafetšakgafetša, kudu ka sehla sa dipula.
Mmoleledi wa maphodisa, Colonel Malesela Ledwaba, o re ba ile go šetša mmila wo le e
mengwe bjalo ka karolo ya bona ya go fediša bosenyi.
