Baotledi ba boditše Seipone gore ye mengwe ya mekoti e na le dikgwedi tše robedi (8) e le gare e
oketšega go se na seo se diregago. Ba re mmušo ga o na taba le mekoti ye.
Godfrey Molele (46) o re nako le nako kotsi e ka direga. “Maphelo a rena a kotsing. Tsela ye e a
ntšhoša ka gore ba leloko la ka ba e šomiša letšatši ka letšatši efela ga re na kgetho ka gore ke tsela ya
kgauswi,” a realo.
Tsela ye e šomišwa ke makgolokgolo a badudi go tšwa metseng ye 50. Ba bangwe ba boifa go šomiša
tsela ye bošego ka ge mekoti ye mengwe e sa ageletšwa.
“Go bonolo gore motho a wele ka mokoting o mongwe bošego. Rena re mahlatse ka gore mekoti ye re
ya e tseba efela go tlo direga eng ka bao ba sa tsebego. Modimo o sa re gaogetše ka gore ga go yo a
gobetšego go fihla Nakong ye,” gwa realo Motsatsi Selowa (29).
Agnes Motupa (35) o re Kgoro ya Mešomo ya Setšhaba le Mafarahlahla e tlogetše mmila wo. “Kgoro
ye e emetše gore go direge kotsi pele mekoti ye e ka lokišwa,” a realo.
Ba bangwe ba re ba phela ba rapela ge ba feta mekoti ye ka ge ba boifa ka gore baotledi ba bangwe ba
otlela bošaedi. Mmoleledi wa Kgoro, Witness Tiva, o re Molekgotlaphethiši Nkakareng Rakgoale o
ile go romela dientšineere gammogo le lekala la ditsela tseleng yeo ya D3180 yeo e tsenelago le
D447. Dinyakišišo tša go lekola go senyega ga tsela ye gammogo le bokotsi bja yona, go akaretšwa le
mekoti ye di ile go dirwa mme tsela ya lokišwa,”
“Dinyakišišo tša tsela go swana le (Geotechnical investigation), tekolo ya meetse a ka mobung
(groundwater analysis) le tekolo ya mabu di tlo dirwa go hwetša tharollo gore tsela ye e bolokege,”
gwa realo Tiva.
