HOEDSPRUIT: Profense ya Limpopo e ketekile kgato e bohlokwa ka go thakgolwa ga tsela
e ntshwa ya difofane tša FlySafair yeo e tlemaganyago Hoedspruit le Cape Town. Kgato ye e
lebeletšwe bjalo ka tsela ya go godiša boeti, go hlohleletša kgolo ya ekonomi le go matlafatša
kgokaganyo magareng ga diprofense.
Ge a be a bolela moletlong wa go tsebiša tsela ye ye ntshwa ka Labone la 2 Diphalane 2025,
Tonakgolo, Ngk Phophi Ramathuba, o boletše gore se ga se feela ka ga difofane eupša ke
tsela ya menyetla ya ekonomi le pontšho ya maitemogelo a go gola ga Limpopo.
Tsela ye e tlemaganya mafelo a mabedi a go tuma kudu mo Afrika Borwa gomme e bewa
bjalo ka mokgwa wa go godiša toropo ya Hoedspruit bjalo ka lefelo le bohlokwa la boeti mo
tikologong ya Kruger go ya Canyon Biosphere.
“Lenaneo le ke la go matlafatša kgokaganyo, go hlohleletša kgolo ya ekonomi le go bula
menyetla mo Limpopo. Ka go matlafatša phihlelelo ya profense ya rena, re nošetša medu ya
ekonomi ya rena go akaretšwa boeti, meepo le temo,” a realo.
Ramathuba o rile ditirelo tše ke karolo ya leano la FlySafair la go godiša phihlelelo ya Kruger
National Park le tikologo ya Lowveld. Difofane di tla šoma gararo ka beke – Labobedi,
Labone le Mokibelo ka ditheko tša go thoma go R1 570 tsela e tee.
“Go tloga mola e thomago ka 2014, FlySafair e hweditše tumo lefase ka bophara bjalo ka
khamphane ya difofane tša theko ya fase. Boitlemo bja yona bja tshepo le theko ye e
kgonagalago di sepedišana le pono ya Limpopo ya go boloka maeto le theko mola di thekga
kgolo ya ekonomi ya selegae,” gwa realo Ramathuba.
O re pele ga boeti, tsela ye e lebeletšwe go tliša mešomo, ya thekga tšhireletšo ya tikologo,
gape ya goga babeeletši. Ramathuba o re tlhabologo ye e swanelana le merero ya profense ya
go thea lefelo la dinamelwa le go katološa boemafofane bja boditšhabatšhaba bja Polokwane,
bjo bo tlago go lebana le temo le meepo.
“Hoedspruit ga se feela lefelo la maeto, ke pontšho ya maikemišetšo a rena a go tlemaganya
MaAfrika Borwa le bobotse bja naga ya rena. Mmogo le FlySafair, re thoma leeto le leswa
leo le tlago dira gore Limpopo e fofe e fihle godimo,” a realo.
