Tiragalo ye e beakantšwe ka tirišano le mmasebotsana yo a
fihlilego makgaolakganyeng a phadišano ya Miss Teen World South Africa 2023, Lehlogonolo
Baloyi (16). Ba etetše barutwana ba go feta 2 000 go tšwa dikolong tša godimo motseng wa
GaSekgopo ka ntle ga Modjadjiskloof ka Labone la 25 Mopitlo 2023.
Nepo e be e le go netefatša gore barutwana ba dikolo tša Kgola Ka Leleme, Mameriri,
Motsheudi le Mohumi ba hwetša tlhahlo ya maleba gore ba kgone go itokišetša ditlhahlobo.
Modulasetulo wa Matsorang Sekgopo Foundation, Matsorang Sekgopo, o kgadile barutwana
gore ba ka se tšwelele ge ba sa theeletše barutiši ba bona.
“Tlogelang monate. Ke a tseba gore bontši bja lena le rata madila efela emišang ka wona le
lebelele dipuku. Nako ya monate e tlo fihla ge le feditše ka dithuto tša lena mme le šoma,” gwa
realo Sekgopo.
Mmasebotsana yo wa go dira mphato wa lesometee sekolong sa godimo sa Maseala Progressive,
o boditše barutwana gore le ge a tsenetše tša bommasebotsana, bobotse bja go hloka mabjoko ga
se selo.
“Ke ka lebaka leo le nna ke ithutago ka thata ka gore bommasebotsana ke seo ke se dirago ka
thoko. Ga go na selo seo se tlago gabonolo efela ka go šoma ka thata, re tla kgona go fihlelela
ditoro tša rena,” a realo.
Lehlogonolo o boditše barutwana gore ga go na motho yo a ka ba thibelago go fihlelela ditoro
tša bona. “Le se ke la ipeya fase ka gore ga se la swanela go hloka diphošo gore le hwetše seo le
se nyakago. Letšhogo le lennyane ga le na bothata efela le se ke la le tlogela le le laola. Ke
kgopela gore le ithute ka thata gore le kgone go ba le bokamoso bja go phadima ka gore ga go na
seo se tlago bonolo ntle le mangwalo,” a realo.
Molaodi wa sedikothuto sa Rakwadu 2 Isaac Motloutsi o re dipoelo tše dibotse di tla go bao ba
šomago ka thata. “Le se ke la inyatša. Šomang ka thata gore le tšwelele,” a realo.
Morutwana Khutso Ramoshaba (15) o re ba hlohleletšegile go šoma ka thata. “Gabjale re a tseba
gore go rulaganya gabotse le go itokiša ke dintlha tša go tšwelela,” a realo.
Lehlogonolo o ile go phadišana le bommasebotsana ba bangwe go thopa sefoka sa Miss World
Teen South Africa 2023 go la Pretoria State Theatre, Gauteng, ka Mokibelo wa 10 Phupu (June)
2023.
