LIMPOPO: Nakong ya ge Tonakgolo ya Limpopo, Dr Phophi Ramathuba, a ala polelo ya
gagwe meagong ya Lekgotlatheramelao mo Lebowakgomo, o tsebagaditše matlotlo a go
lekana R42 milione Kgorong ya Maphelo. “Peeletšo ya R42 milione ke ya go reka ‘skena’ se
seswa sa bongaka sepetleleng sa Pietersburg. Motšhene wo o bitšwago skena sa PET-CT, o tla
thuša dingaka go lemoga malwetši a go swana le kankere ka pela le go alafa balwetši ka
katlego e kgolo,” a realo.
Na o tsebang ka ‘Nuclear Medicine’?
Nuclear Medicine ke mohuta wo o ikgethegilego wa kalafo wa go tšea diswantšho tša ditho
tša mmele le go di sekaseka wo o dirišago tekanyo e nyenyane ya dilo tše di nago le
mahlasedi bakeng sa go bona ka moo ditho le megangatšhika (tissues) di šomago ka gona.
PET scan e latela dilo tše ka gare ga mmele bakeng sa go gatelela mafelo ao a nago le
bothata, mola CT scan e tšea diswantšho tšeo di tletšego tša ditho. Mmogo, di nea dingaka
seswantšho/pego yeo e kwagalago/hlwekilego ka malwetši. (wepesaete NIH).
Wepesaete ya ‘Wired’ e re Le ge kalafo ya nuclear e le e maatla, e ithekgile ka kabo yeo e sa
kgaotšego ya didirišwa tša radioactive tšeo ka dinako tše dingwe di bego di hlaelela lefaseng
ka bophara. Le ge go le bjalo, ka peeletšo ye, Sepetlele sa Pietersburg se beakantšwe go ba
ketapele ya go tšea diswantšho tša kalafo ya maemo a godimo, go fa ditirelo tša go hlahloba
tšeo di phološago maphelo a balwetši go ralala le profense.
