Dikarolo tša lebala fao go bego go šomelwa gona le fao go bego go dutšwe, di be di khupeditšwe ka
meriti ya botalamorogo ya khamphani ya go boloka bahu ya AVBOB bjalo ka mothekgimogolo wa
diphadišano. Bontši bja digotlane bo be bo feletše ka diyunifomo tša dikolo tša tšona ya namune, e
meserolwane, e mehubetšwana, ya botalaleratadima le mebala e mengwe. Di rile ge di tla fihliša
mebala sehloeng, digotlane tša Sekolo sa Bomapimpana sa Ratang Bana tša felela ka seaparo sa go
dirwa ka mebala ya folaga ya naga. Dikgopana di be di dikologile karolo ya lepatlelo ka yunifomo ya
folaga yan aga go laetša gore, le ge ba reng… ye ke tiragalo ya bosetšhaba!
Esego fao feela… batšeakarolo le barutiši ba bona ba be ba feletše ka mebala ya sekgoboko sa bona.
Sekgoboko sa Polokwane se be se apere botalalerata, sa Mankweng se swerwe ke mmala wa namune,
Mogodumo e feletše ka boserolwane mola Zebediela se be se apere bohubetšwana. Barutiši ba be ba
lemoga dikgopana ka mebala ya sekgoboko sa bona mola bana le bona ba be ba tsebana ka mebala ya
sekgoboko sa bona. E be e le taba ya go bona, go tseba le go šomišana le batho ba mmala wa geno. E
be e le mmala mo, mmala moo le mmala mola!
Fela e be e se feela taba ya go bona le go tseba mebala ka go e lebelela ka mahlo eupša e be e bile e le
taba ya go diriša mmala go rarolla bothata bja bophelo ka go diriša mebala. Ye nngwe ya dipapadi e
be e nyaka gore ngwana a kitime lebelo la dimethara tše 20, a tope bolo ya mmala wo o rilego ka
sekotlelwaneng seo se tletšego dibolo tša mebalabala. Segotlane se tla kitima 20 methara go ya go
lahlela bolo ka gare ga legapana pele se tlogelela gape go lata bolo ya mmala o mongwe. Karolo ya
bothata bja lebelo le ke go kgona go gopola gore na kgopana e šetše e topile le go lahlela dibolo dife
ka legapaneng. O hwetša kgopana e kitima e swere bolo ya bobedi e khubedu… e lebetše gore e šetše
e lahletše bolo e khubedu ka legapaneng. Ya ba nako ka mo e a roropa mola dithaka le tšona di
tshetshetha…Mothopasefoka ke segotlane seo se kgonago go topa le go kgobokanya dibolo tša
mebala ka moka pele ga ba bangwe.
Heehee ‘naka’ e balama/dula ka 25 Mopitlo mme leo ke letšatši la go tonya go hlomola le moloi
pelo…heehee leo e ka se be letšatši la dipapadi – ke eng tšeo di bego di direga lepatlelong la Peter
Mokaba? Le be le hlabile gabotse… go ruthetše lepatlelong. Bontši bja batho bo be bo apere diaparo
tša dipapadi tša mebalabala. E be e se feela phadišano ya dipapadi eupša e bilen e le ya mebala ya
molalatladi. Ntle le pelaelo, bao ba bilego fao ba ipshinne!
