Mpe o re tirelo ya dipase tša bona key a maemo a godimo lekaleng la dinamelwa tša setšhaba. Dipase di
sepela ka nako, di a botega, di bolokegile, di a swarega ka ditefišo ebile di fihlelelega gabonolo. Mo nakong
ye di abela setšhaba ditirelo Seshego, Motsemogolo, Nirvana le Florapark. Nakong ya dipoledišano le
Setšhaba ka Leano la Tlhabollo ya Mohlakanelwa (IDP), dikgoboko tša go fapana tša masepala di laeditše
kganyogo ya go humana ditirelo tša Leeto la Polokwane. Masepala o kwele dillo tša setšhaba gomme bjalo ka
masepala wa go ba le tsebe, leano ke go katološetša ditirelo tša dipase dikgobokong le diwateng tše dingwe
mengwaga yeo e tlago ya ditšhelete.
“Le ge tirelo ya rena ya dipase e thomile ka go nanya mabapi le taba ya go nametša batho, ditaba di fetogile ka
morago ga dikgwedi tše robedi (8) ka morago ga go tsenya tirišong leano la go dumelelwa ke khansele la go
retolla dilo. Bjalo re alogile go tloga maemong a go bitšwa ‘Leeto la Baotledi’ mme bjalo ka kgonthe re
‘Leeto la Polokwane’! Kgweding ya mathomo ya go aba ditirelo ka Diphalane 2022, re be re rwala palogare
ya banamedi ba 3 148 ka kwedi – gabjale re rwala ba 66 450 ka kgwedi,” Mpe a realo ka boitumelo.
Mpe o re Leeto la Polokwane le hlotše tirišano e bohlokwa go lenaneo la dinamelwa leo le amago mekgatlo e
meraro ya dithekisi yeo e amegago. Tirišanommogo magareng ga masepala le mekgatlo ya dithekisi e butše
tsela ya go kaonafatša ditirelo tša dinamelwa tša bohle mola e hloletše bao ba bego ba šomela dithekisi mediro
ya go botega le go bolokega mola e abela bagolofadi ditirelo tšeo peleng ba bego ba sa di humane.
“Mathomong Leeto la Polokwane le be le diriša dithekethe tša pampiri bjalo ka mokgwa wa go lefa fela
sammaletee re be re šomana le lenaneo la elektroniki la go lefiša leo le sepelelanago le Bus Rapid Transit
(BRT). Mananeo a BRT ka tlhago ya wona ga a diriše tšhelete ya seatleng eupša a diriša tefo ya
‘morethaoitiriša’ (Automated Fare Collection goba AFC). Go tloga ka 01 Mosegamanye (Julae) 2023, Leeto
la Polokwane ga le sa ya go diriša dithekethe tša pampiri empa ‘Dikarata tša Maeto’. Dikarata tša Maeto tša
Leeto la Polokwane di thantše (di tšhumile mabone) gomme di ka dirišwa le mananeo a mangwe a ditirelo tša
dinamelwa ao a dirišago mananeo a morethaoitiriša go selaganya Aforika Borwa bjalo ka ‘A re yeng’ ya
Tshwane, ‘Re a Vaya’ ya Johannesburg, ‘MiCity’ ya Motsekapa gammogo le Gautrain. Dikarata tša maeto tša
Leeto la Polokwane’ ke morekelaruri ka gore ge o e swere, o ka kgona go diriša ditirelo tša dinamelwa tša go
fapana naga ka bophara,” Mpe a realo ge a hlalosa.
Go humana dikarata tša maeto, go nyakega gore motho a ingwadiše. Nako le nako ge motho a diriša karata, go
tšwelela molaetša wa gore na o lefisitšwe bokae le gore na go šetše bokae ka gare ga karata. Ka 03
Mosegamanye 2023, masepala o tla ba o thakgola ‘App’ ya Leeto la Polokwane yeo batho ba ke e beago
godimo ga diselefoune tša bona go ba thuša go beakanya maeto a bona. Polokwane ke mošupatsela go
Page 2 of 2
theknotši ye ya dinamelwa ebile mmušo wa bosetšhaba o kgopetše masepala go abelana ka bokgoni bja wona
go thuša naga go phatlalatša tsebo ye go mananeo a dinamelwa naga ka bophara.
