GLSCRP ke lenaneo la mengwaga e meraro leo le etilwego pele ke setšhaba la go katološa Mananeo a
Tirišontši ya Meetse (Multiple Water Use Systems goba MUS) le maatla (enetši) ya letšatši (solar) go
hlabolla, go fatišiša le go laetša ditharollo tša go kgonega tša nako e telele tša tirišo ya meetse le phetogo
ya boso tikologong ya Giyani go kaonafatša methopo ya meetse, tirišo ya wona, kgotlelelo ya setšhaba
le tlhabollo ya ekonomi ya tikologo.
Mo nakong ye, projeke e phethagatšwa mafelong a mahlano a temo e lego Polasa ya Daniel Ravalela,
Polasa ya Dzumeri, Polasa ya Leloka, Polasa ya Dzumeri 2 le Projeke ya Setšhaba ya Muyexe. Gape
projeke e phethagatšwa le mafelong a mangwe a mane a setšhaba e lego mafelo a Mbhedle, Mayephu,
Mzilela le Matsotsosela fao e holago setšhaba sa go lekana badudi ba 5 000.
Mna Walter Segooa, yo e lego Motlatšamolaodipharephare wa Taolo le Ditlemagano tša Bakgathatema,
o saenne memorantamo legatong la Mmušo wa Profense. O gateletše go sepelelana ga tirišano ye e
bohlokwa le dinepo tšeo di beilwego pele le ditlhologelo tša Leano la Tlhabollo ya Limpopo (LDP).
Leano le le nepile go kgonthišetša tlhabollo yeo e kgomaganego ya nako e telele ya leago le ekonomi le
tlhabollo ya mafarahlahla mola e kaonafatša boleng (khwalithi) bja bophelo bja baagi ba Limpopo.
Mmušo wa Flanders o abile R40 milione mo nakong ya mengwaga e meraro go thekga maitekelo a
gomme e tlo rungwa ka 2024. Ka morago ga fao, projeke e letetšwe gore e kgone go itšwetša pele ka
noši.
Mna Nikolas Bosscher, yo e lego moemedi wa Mmušo wa Flanders, o laeditše bohlokwa bja tirišano ka
go re: “Ditlhotlo tšeo di lebanego le Afrika Borwa, kudu Limpopo, ke bja tikologo ya komelelo ya go ba
le mathata a tlhokego le kabo ya meetse. Mo Giyani, mathata ao a bonala kudu, kudu tabeng ya go
fihlelela Dinepo tša Tlhabollo tša Ngwagasome (MDG) tša 2026”.
Dr Jennifer Molwantwa, yo e lego Molaodiphethiši (CEO) wa Water Research Commission, o gateletše
bohlokwa bja go humana bokgoni le tsebo go matlafatša ditšhaba go laola ditikologo tša tšona. O rile:
“Projeke ye e adile motheo wo re ka ithutago ka wona le go dira tše ntši ka bonnyane. Dithuto tšeo re di
humanego go tšwa go lenaneo le di tla re abela tshedimošo le tsebo e bohlokwa tšeo di tlago re hola go
diprojeke tša ka moso. Tsebo ya bogologolo ge e kopanywa le boitlhamelo bja saense, di thušištše
ditšhaba go itlwaetša diphetogo le go gatela pele”.
