Go thenkgolla dilo, rammino o tla se rage koša ya go tuma ya Ray Phiri ya ‘Phinda Mzala’. O tla se bone yena Tlou ka sebele a emelela. Rrrrrr … holo ka moka e ile ya emelela ka maoto gore batho ba kgone go ‘Phinda Mzala’. Kua sefaleng e be e le moisa yo motelele … yena Dr Tlou Setumu ka sebele … tholi ka matepe e be e e tataganya maoto ….ya huduwa leoto la go ja le eya pele … ya huduwa la nngele le boela morago …tholi ya bobama e pompa matsogo ka mo mathoko… Kgaetšedi ya gagwe yo ba tsenego sekolo sa praemari mmogo e tla se mo hlatlole sefaleng na! Ge kgadi e phuruloga e iša maoto pele le morago … maoto a eya ka thoko ye le ka thoko yela pele e dikologa, tholi yona ka mola e šikinya letheka e bobama e eya tlase … e eya tlase … e eya tlase…
“Magagešo, ge le bona re phuthegile fa re a keteka. Re keteka go lokollwa semmušo ga puku ka bophelo bja se sengwe sa dikgwari tša go hlomphega mo Aforika Borwa, Aforika le lefase ka bophara – Ray Chikapa Phiri. Yunibesithi e kgolokgolo mo nageng, Unisa, malobanyana fa e sa tšwa go mo hlompha ka go mo abela tikrii ya bongaka mola South African Music Awards (SAMA) le Metro di tšere sephetho sa go mo hlompha ka Sefoka sa Bophelo (Lifetime Award). Le rena fa mamohlare rolela Chikapa Phiri mongatse mme re tšwela pele ka moletlo wa go keteka senatla se ka go thakgola puku yeo e bolelago tša bophelo bja sona yeo e ngwadilwego ke sekgwari se sengwe sa mabethela, Dr Tlou Setumu,” gwa realo leleke leo le tlwaetšego go lokolla molokoloko wa tšeo di lego malekelekeng, ‘The Mixerboy’, Thamagana Mojapelo ge a ala morero wa letšatši.
“Dr Tlou Setumu ke rahistori, mofatišiši, mongwadi mola e bile e le mophatlalatši wa dingwalwa. Bjalo ka mofatišiši, o phuruphuditše tša bophelo bja Chikapa – o belegetšwe kae le gona neng, batswadi ba gagwe ke bomang, o tsene sekolo kae, o thomile neng tša mmino le gona a huetšwa ke eng – leeto la gagwe bjalo ka modiragatši wa mmino. Bjalo ka mongwadi, Setumu ga a ngwale feela ka tšeo a di badilego ka Chikapa eupša tšeo a di kwelego thwii go tšwa molomong wa gagwe. Gape o tsenetše ditiragatšo tše dintši fao Chikapa a bego a laetša meragelo ya gagwe. Le ge tše dingwe a di kwele di anegwa, karolo ya tšeo Dr Setumu a bolelago ka tšona ke tšeo a bilego karolo ya tšona … tšeo a di phetšego bjalo ka rahistori.
“Ka mmala wa yona o mohubedu le seswantšho sa Ray Phiri a swere katara letlalong la ka pele la puku mola go la ka morago a na le maloko a sehlopha sa gagwe sa Stimela, puku ya ‘Singa Jindi Majita’ o tla e rata, ngwanaka. Ka polelo e bonolo ya go elela le tatelano ya makgethe ya ditiragalo le dikgopolo, puku ye ke mohuta wa dipuku tšeo di gatišago bodutu kosene … dipuku tšeo di rego go bodutu tša re ‘a bo re hwaa’. Go bakgoboketši, ye ke puku yeo o tla thabelago go bona e le karolo ya mokgobo wa gago. Go anegelwa ke go tingwa. Ithekele khophi ya gago gore le wena o sepele leeto la setimela le Raymond Chikapa Phiri,” Mojapelo a realo a konketša batho ka mateng a Singa Jindi Majita…!!!
ššš šššššššššššššššš ššššššš šš šššššššššššš šššššš ššššššššššššššš šššššššššššš ššššššššššš šššššššššššššššš ššššššš ššššš
šššš
