Maitekelo a a tlile ka dienywa tše dibotse fao go tšweletšwago dikhreiti tše 400 tša tamati ka beke. Maloko a setšhaba ao a thwetšwego ke Serapa sa Setšhaba sa GaPila (GaPila Community Garden) a rekiša ditamati tše mebarakeng. Katlego ye ke phihlelelo e kgolo go morero wa go hloma dipolasa tša temo tšeo di ka kgonago go tšwela pele go phela.
“Re kgonne go fetišetša tsebo le bokgoni bja setekgniki bja temo go thuša Serapa sa Setšhaba sa GaPila gore se kgone go fihlelela le go tsenelela mebaraka e megolo. Ka go dira se, re holofetše go bopa setheo sa temo seo se kgorometšwago ke setšhaba seo se tlago godiša tšhireletšego ya dijo go maloko a setšhaba sa tikologo le go kgontšha balemi ba tikologo go bapala karolo ka mo go bonalago go lekala la temo,” gwa realo Godfrey Black yo e lego Molaodi wa Projeke ya Impact Catalyst SEF.
Ka lebaka la go šoma ka maatla ga maloko a setšhaba sa GaPila, Serapa sa Setšhaba sa GaPila mo nakong ye se tšweletša dikhreiti tše 400 tša tamati ka beke tšeo di rekišwago mebarakeng ya go fapana bjalo ka mebaraka ya Gauteng le Tshwane. Go fihla mo nakong ye, polasa e dirile tšhelete yeo e tlago beeletšwa gape godimo ga lenaneo le. Go feta fao, polasa e na le monyetla wa go abela Mozambique ditamati tša Gem.
“Ditamati tša Gem di nyakega kudu Mozambique. Ka gona, se ke monyetla o mobotse fao maloko a setšhaba sa GaPila a ka thibago lešoba le. Mašeleng ao a dirwago ka go rekiša puno, a tla lebišwa kudu go morero wa go kaonafatša mošomo wa serapa gore se kgone go phela go ya pele. Gape se se akaretša peeletšo go methopo yeo e nyakegago ya tšweletšo bjalo ka peu le dikgerekgere tša go šoma go tiišetša gore serapa se humana tlhokomelo e botse,” Black a tlaleletša ka go realo.
Pele ga serapa se, maloko a setšhaba sa GaPila a be a ithekgile ka methopo ya dijo ya go tšwa ka ntle ga setšhaba. Se se ile sa laetša nyakego ya go amega go merero ya temo ya selegae. Go feta fao, le ge go na le bokgoni bja go tšweletša ditšweletšwa tša maemo a godimo, ditlhotlo tša go swana le tšeo di kago dirwa ka morago ga puno go oketša boleng bja ditšweletšwa, tlhokego ya bokgoni bja setekgniki bja go laola polasa ya setšhaba peleng di be di thibela kgolo ya serapa.
Ke ka tlase ga mabaka a fao Impact Catalyst, Monte View, IDC gammogo le Anglo-American Platinum di šomago mmogo go thekga Polasa ya Setšhaba sa GaPila. Ka ntle, le godimo ga thekgo ya Serapa sa Setšhaba sa GaPila go humana dimaraka, IDC e abetše maloko a setšhaba a 100 dikgoba tša mešomo ya go hlokomela tshepetšo ya polasa ya letšatši ka letšatši. Ba šoma palo ya magareng ga matšatši a 8 le a 12 kgwedi ka kgwedi fao megolo ya bona e thekgilwego ke Sekhwama sa Mešomo ya Leago (Social Employment Fund).
“Monyetla wo wa mešomo ye ga se wa thuša feela gore maemo a ekonomi a maloko a itekanela eupša e bjetše le moya wa bong bja mohlakanelwa,” Black a realo.
