MOLETJIE: Ke mengwagangwaga badudi ba rapela mmušo gore o ba agele setiši sa
maphodisa motseng wa bona ka ge bosenyi bo gola ka lebelo. Ka metse ya go feta 160,
badudi ba Moletjie ka ntle ga Polokwane ba be ba gapeletšega go ya setišing sa Seshego go
tlaleya melato moo badudi ba bangwe ba bego ba sepela lebaka la go feta 100km.
Se e be e le morwalo go bona ka ge ba ba bangwe ba be ba feleletša ba palelwa ke go tlaleya
melato ka lebaka la tlhokego ya mašeleng a go lefela dinamelwa tša bohle. Ba bangwe ba be
ba botšwa gore difatanaga di a hlaela ge ba tlaleya melato.
Gabjale badudi ba thabile mme ba goga moya gabosana ka ge dithapelo tša bona di arabilwe.
Se se tla ka morago ga gore Tona ya Maphodisa, Senzo Mchunu, a bule semmušo setiši sa
Phaudi, motseng wa GaPhaudi go la Moletjie. Go bulwa ga setiši se go sepedišana le
maikemišetšo a mmušo a go fihliša ditirelo tša sephodisa mafelong ao a tletšego bosenyi le
go fihliša maphodisa kgauswi le setšhaba.
Tona Mchunu o re ba bula setiši se ka nepo ya go matlafatša tšhireletšo le ditirelo tša
sephodisa. “Setiši se se ka gare ga karolo ya leano la go fihliša dinyakwa tša sephodisa le go
fihliša maphodisa kgauswi le ditšhaba,”a realo. O re ba nyaka go otlolla ditirelo tša go
obamela molao mo profenseng ya Limpopo bjalo ka karolo ya go godiša kgato ya melao
mafelong ao a tletšego bosenyi.
“Re nyaka gore maphodisa a tlale naga. Re nyaka go matlafatša ditirelo tša rena mme re ile
go lebelelana le ditiragalo ka moka tšeo di sego molaong. Re nyaka go netefatša gore batho
ka moka ba kgona go fihlelela maphodisa, re sa nyake go tseba gore ba mo kae,” gwa realo
Tona. Mchunu o hlohleleditše maphodisa gore a šome ka thata kgahlanong le basenyi mme a
se laetše kgethologanyo.
Badudi ba be ba tletše lethabo ka ge ba tseba gore matshwenyego a bona a fihlile mafelelong.
“Ke kgale re llela setiši se mengwagangwaga mme re thabile gore ba re agetše. Re tshepa
gore maphodisa a tla re abela ditirelo tša maleba, a se rothe dinala,” gwa realo Happiness
Mathekga (37).
Jacob Molekane (29) o rile: “Setiši se se ile go re thuša kudu ka go fokotša bosenyi nageng ya
rena ka gore bo tšwele taolong,” Badudi ba hlohleleditšwe go hlokomela setiši se le gore ba
se se senye.
