“Maphodisa a Limpopo a tswaletše dikoma tšeo di sego molaong. Ka morago ga go tswalelwa ga
koma ka Leboeng, GaMoraba ka Sekhukhune, tshepedišo ya go boelanya bašemane ba 34 le
malapa a bona e thomile,” gwa realo Mokomishinare Masemola.
O boletše gape gore makgarebe a 115 a hlakodišitšwe komengtsoko kua Driekop. “Tshepetšo ya go
boela gae ga bona e a tšwela pele.”
E nngwe ya dikoma tšeo di sego molaong kua Nebo, Hlogo-tlou e ile ya tswalelwa gomme
bašemane ba 71 ba bušetšwa go batswadi ba bona.
Go ya ka Masemola, bašemane ba 14 gabjale ba mo tshepedišong ya go kopanywa le batswadi ba
bona ka morago ga gore mogononelwa go tšwa komeng yeo ka Sebayeng, Makotopong, a golegwe
ka molato wa go sepetša koma yeo e sego molaong.
Moswaramatlotlo wa mokgahlo wa go emela magoši wa Rolesa, Kgoši Letsiri Phaahla, o laeditše
go se thabišwe ga gagwe ke go tswalelwa ga dikoma tšeo .
“Rena bjalo ka baetapele ba setšo, re kgahlanong le dikoma tšeo di sego molaong eupša ge bao ba
wetšego dikomeng tšeo ba phološitšwe, ga se ba swanela go išwa gae eupša ba ka išwa dikomeng
tša kgauswi tšeo di lego molaong.
Kgoši Phaahla o boletše gape go re “Bjalo ka magoši, re ka se re le gatee ra re mola motho a hlagile
lebollong, ra re go yena a boele gae goba sepetlela. Mmušo o be o swanetše go tla ka leano la go
laola dikoma e sego go šunyašunya nko ya wona dikomeng,”gwa realo Phaahla.
Kgoši Phaahla o tšwetše pele ka go re setšo sa dikoma sa MaAfrika se a hlapelelwa, se senywa ke
batho bao ba sa hlomphego dikoma.
“Setšo sa rena bjale se nyenyefatšwa ke baetapele bao ba sa hlomphego dikoma gomme seo se tla
ama bao ba wetšego dikomeng gampe,” a realo.
O ile a sola gape le dikomiti tša profense tšeo di kgethilwego go laola dikoma.
“Gabjale go tlilwe ka dikomiti tšeo ba reng ke tša diprofense tša go laola dikoma. Ka gare ga tšona
o hwetša mosadi wa mooki, mothomošweu le yo mongwe yoo a sa tsebeng bogoši le dikoma. Bjale
ge go e ba le dikoma tšeo di sego molaong, ba tlo kitimela gore bana ba ye magae eupša ge e be di
etilwe pele ke magoši le dingaka tša setšo tšeo e leng beng ba dikoma, go be go ka se be le
tlhakahlakano ye re e bonang. Tše re di bonang ke mahlabišadihlong!” gwa realo Phaahla.
Ge a bolela ka kotsi ya go ntšha bana dikomeng mme ba išwa gae, Phaahla o re:
“Koma ya go ba ya maleba, ge bana ba tsena, re a ba upela gore ba se tsene ke malwetši le gore ba
se angwe ke boloi. Re tlo re mola ba aloga ba tlotše matsoku, ra ba upulla gore ba se sepele le
dipheko ba ya le tšona ka gae ka ge di ka tla tša ba tshwenya. Gabjale bana ba modimo ba sepetše
ba upetšwe. O iphotšiše gore ngwanola ge a gola o tlo ba bjang tlhaloganyong ya gagwe ka ge a se
a upullwa. Nnete ke gore tlhaloganyo ya gagwe e tlo šarakana”.
O ipileditše go batswadi bao bana ba bona ba boilego dikomeng di šele gore ba kitimišetšwe
dikomeng tša maleba.
