Vakhegula-Vakhegula ba ile go leba Mauritius ka Labone, 25 Moranang 2024, mme ba bowa ka Mošupogo, 29 Moranang 2024. Mohlami wa thonamente, Mama Beka Ntsanwisi, o re o thabišwa ke go kwalakwatša gore sehlopha sa Vakhegula-Vakhegula se ile go etela Mauritius go hloma sehlopha se sengwe. Efela gore bakgekolo ba ba fihle Mauritius, ba nyaka thušo ya tšhelete gore leeto la bona le fetoge nnete.
Ntsanwisi o re ba hlohleletša batho ka moka le mmušo go ba thuša gore ba kgone go fihlelela toro ya bona gammogo le dihlopha ka moka lefase ka bophara.
“Re nyaka moaparo wa go swana (yunifomo), senamelwa sa go ya boemafofane bja O.R Tambo, didirišwa tša kgwele ya maoto le tefelo ya sehlopha ka moka,” a realo.
O re ga go na moneelo wo o ka bago o monnyane go leeto le la bona. “Dikabelo ka moka go tla go Beka Ntsanwisi Foundation di ile go thuša sehlopha sa ka le nna gore pono ye e kgolo e fetoge nnete. Ke fela pelo ya go bona bakgekolo ka moka ba kgwele ya maoto go la Mauritius,” a realo.
Thonamente ya mathomo ya kgwele ya maoto ya bakgekolo e ralokilwe lepatlelong la Nkowankowa ka ntle ga Tzaneen ka kgwedi ya Hlakola 2023 mme ya thopša ke sehlopha sa U.S Breakers.
Thonamente yeo e tsenetšwe ke dihlopha tša Aforika Borwa gammogo le tša go tšwa dinageng tša go swana le Mozambique, USA, Zambia, Zimbabwe le France.
Ntsanwisi o re nepo ya gagwe ke go bontšha lefase gore mengwaga ya motho ke palo feela. “Thonamente ye e fa bakgekolo sebaka sa go ipshina. O kgobokantšha bakgekolo go tšwa dinageng ka mehutahuta mmogo ka thaloko ye e botse,” a realo.
Sehlopha sa Vakhegula-Vakhegula se thomile ka 2005 ka nepo ya go thuša bakgekolo gore ba tiye mme ba phele maphelo a go hlweka, maphelo a bona a oketšege le malwetši a ralokele kgole le bona.
