MMEGI WA SEIPONE
Ga se ka phošo ge baetapele ba Makgabeng ba dirile kgopelo ya gore Dithaba tša Makgabeng di amogelwe bjalo ka Lefelo la Lefase la Bohwa ka lebaka la diswantšho tša moswananoši tša bogologolo tša go thalwa godimo ga maswika. Gape go utolotšwe gore go na le dimela tše dingwe tšeo di sa humanwego felo lefaseng ka bophara ka ntle le Dithabeng tša Makgabeng. Ga se feela bohwa bja tlhago bjo tikologo ya Makgabeng e humilego ka bjona eupša e humile gape le ka setšo sa ditšhaba tša tikologo yeo tšeo di tšweletšago bohwa bja tšona kudu ka mokgwa wa dikoša le mmino wa setšo. Tše dingwe tša dihlopha tša kgale tša mmino wa setšo tša tikologo ye di akaretša ‘Dikgwari tša Kobe’, ‘Dietlaetla’ le ‘Bana ba Kgokonyane’.
Sehlopha sa Bana ba Kgokonyane ke se sengwe sa dihlopha tša basadi tša mmino wa setšo sa tikologo ya Makgabeng. Ka diroko tša bona tše ditšhweu tšeo di tswakilwego ka mašela a mebalana ya bohubetšwana le botalalerata bja go topela, dipheta tša mmala wa phinki, ka mašela goba dituku tše khubedu hlogong … o tla ba rata ge ba tsene košeng! Ge ba bina, ba dirile sediko fao ba binago ba eya pele …. sammaletee ba tšhatšhatha ba eya thoko yela …. ba tšhatšhatha ba etla thoko yeno ….ba emišetša matsogo godimo. Ke moka ba thoma go bin aba eya ka sa morago …ba tšhatšhatha ba etla keno … ba tšhatšhatha ba eya mola thoko … ba emišetša matsogo godimo – mola kua thokwana meropa o tlapela seatla, go lla medumo… E be e le pontšho e botsana … pontšho e bosana yeo e nyakago motho a iponela le go ikwela yona ka mahlo le ditsebe tša gagwe ka gore segagešo se re ‘go anegelwa ke go tingwa, go bona go swana le go ja – ga di direlwani’.
Botse bo bonwe le go kwewa ke bao ba bego ba tsenetše thutophahlošo. Ka mmino wa bona, ga lebakanyana, Bana ba Kgokonyane ba be ba tšere lehumo la setšo le bokgabo tša Makgabeng mme ba di tlišitše meagong ya Yunibesithi ya Limpopo. Mmino wa bona, e be e le seka le taetšo ya lehumo la setšo leo tikologo ya Makgabeng e le rwelego leo le ka golago le go fetoga lehumo la ekonomi le boiphedišo la nako e telele ge kgopelo ya gore Dithaba tša Makgabeng di amogelwe ke UNESCO bjalo ka Lefelo la Lefase la Bohwa, di ka atlega.
