Lenaneo la dikoma le thomile ka la 16 Phupu mme le tla gagaba go fihla ka la 15 Mosegamanye. Sekolo
se se nepilwe go fa bašemane le basetsana sebaka sa go ithuta ka ga ditlwaelo, diila, boitshwaro le
mekgwa ya go phela tša setšhaba sa gabobona. Gape ba ithuta ka ditume, bohlokwa bja tirišano le
thekgano bophelong, go obamela melao ya setšhaba, tlhompho le dikokwane tše dingwe tša bophelo.
Molekgotlaphethiši wa Pušotirišano, Bodulo le Merero ya Setšo (COGHSTA), Basikopo Makamu, o sa
tšwa go swara kopano ya boraditaba ya maemo boitokišo. Yena o re profense e bone go fokotšega ga palo
ya bao ba tsenego dikolong ngwageng wo.
“Palo ya dikgopelo tša dikolo tša koma tšeo di amogetšwego e theogile go tloga go 680 ngwagola go ya
go 644 ngwageng wo. Palomoka ya dikolo tše 587 di dumeletšwe tšeo tše 328 e lego tša banna gomme tše
259 e le tša basadi,” Makamu a realo.
Selete sa Sekhukhune se etile pele ka dikolo tša koma tšeo di dumeletšwego tše 285 gomme sa latelwa ke
Capricorn ka tše 127 mola dilete tša Waterberg (84), Mopani (51) le Vhembe (40) di bopa tše dingwe.
Go netefatša polokego ya bao ba thomilego le go šoma gabotse ga dikolo, COGHSTA, Kgoro ya
Maphelo, Ntlo ya Limpopo ya Baetapele ba Setšo le bakgathatema ba bangwe ba swere thuto le baetapele
ba setšo le baswari ba diphemiti go itokišetša sehla.
Go ya ka Karolo ya 2 (1) ya Molao wa Sekolo sa Koma sa Profense ya Limpopo No. 6 wa 1996:
· Ga go motho yo a tlago bula sekolo sa koma ntle le tumelelo ye e šomago yeo a e filwego
· Ga go ngaka ya setšo goba motho yo mongwe yo a dumeletšwego go phethagatša merero ya koma ntle
le setifikeiti sa go swanelega seo se ntšhitšwego ka morero woo ke ngaka ya kalafo ye e ngwadišitšwego
yeo e dumeletšwego ke Tonakgolo goba mohlankedi yo a dumeletšwego go dira bjalo go ya ka Karolo 3
(1) ya Melawana ya Dikolo tša koma ya 2003;
· Ga go motho wa mengwaga ya ka fase ga ye lesomepedi yo a ka amogelwago sekolong sa lebollo go ya
ka Karolo ya 7(1) ya Melawana ya Dikolo tša lebollo ya 2003; le
· Ga go motho yo a dumeletšwego go thopa yo mongwe ka nepo ya go mo iša sekolong sa koma go ya ka
Karolo 9(1) ya Melawana ya Sekolo sa Koma ya 2003.
Makamu o eleditše batswadi gape go obamela tekanyo ya mengwaga ya dikolo tša lebollo le go netefatša
go ba molaong ga dikolo tšeo ba ikemišeditšego go romela bana ba bona go tšona. O okeditše ka gore ba
tla šoma gape le ditheo tša phethagatšo ya molao go thibela tahlegelo efe goba efe ya maphelo yeo e sa
nyakegego le go netefatša gape gore ditokelo tša bao ba thomilego ga di gatakelwe.
