“Letšatši la Boditšhabatšhaba la Leleme la Letswele ga se moketeko eupša segopotšo sa baithuti ba Bangladesh bao ba ilego ba bolawa ka 1952 ge ba be ba lwela gore leleme la bona la Bangla (esego English) le dirišwe bjalo ka la semmušo. Taba ya go ithuta ka leleme la bona e tšwetše batho ba Bangladesh mohola ka gore ba ithuta dilo ka moka ka leleme la bona. Gonabjale naga ya bona ke e nngwe ya diketapele go merero ya theknolotši. Go na le bao ba dumelago gore theknolotši e nyaka Seisemane fela taba yeo ga se nnete… o ka ithuta theknolotši ka leleme lefe goba lefe. Re swanetše go gapeletša gore maleme a rena a dirišwe ge re nyaka gore a gole le rena re gole. Ge o rata go rekiša eng goba eng mmarakeng wa Dinagakopano tša Yuropa (EU), o gapeletšega go hlalosa setšweletšwa seo ka maleme a 8 a Yuropa. Ge o sa dire bjalo, setšweletšwa sa gago se ka se dumelelwe. Rena re metša dipilisi le dihlare tšeo di hlaloswago ka maleme ao re sa a tsebego. Ge o boloka leleme, o boloka le tsebo yeo e swerwego ka leleme leo. Bothata bjo bogolo bjo bo dirago gore Aforika Borwa e be mošate wa megwanto ke taba ya dikgokagano. Ke hlohleletša badudi ba Polokwane gore ba gane go lefela mangwalo a dikoloto ao a ngwadilwego ka Seisemane mme ba kgorometše gore a ngwalwe ka maleme a bona. Ke mo o tlago bona masepala o phafoga mme o bolediša batho ka maleme a bona. A re kgorometšeng gore re boledišwe ka maleme a rena,” Dantile a realo ge a ruma.
“Ge re boloka maleme a rena, re boloka bohwa bjo borakgoloarena ba re tlogeletšego bjona. Re swanetše go keteka letšatši le ka boikgantšho ka gore maleme a rena a bolela seo re lego sona. Mna Dantile, ke a go tshepiša gore ngwaga wo o tlago re ya go abela barutwana difoka tša bokgoni bja maleme a gabobona. Maleme a rena a a rutwa dikolong fela re nyaka gore batswadi ba re thuše ka go ruta bana ba maleme a ge ba le gae. Bjalo ka Kgoro ya Thuto, moeno wa rena o re ‘Thuto ke morero wa Setšhaba’. Go bohlokwa gore re šireletše maleme a rena. Re duma gore bangwadi ge ba ngwala dipuku tšeo di šomišwago ka dikolong, ba šomiše diswantšho tšeo di swanago le rena,” gwa realo Molekgotlaphethiši wa Kgoro ya Thuto, Mdi Mavhungu Lerule-Ramakhanya, ge a efa mantšu.
“Bao ba ntsebago, ba a tseba gore ke bolela segagešo bogolo bja letšatši le lengwe le le lengwe. Go na le mehola e mentši go taba ya go bolela leleme la motho. Ke a dumela gore barutwana ba ka šoma bokaone ge ba rutwa ka maleme a letswele. Re itlemile go maikemišetšo a go re ka 2030, ngwana yo mongwe le yo mongwe a be a kgona go bala ka kwešišo ge a fihla go Kreiti 4. Go bohlokwa gore re be setšhaba sa malementši gomme re phefe go nyenyefatša maleme a batho ba bangwe. Batho ka moka ba tsebja le go itseba ka maleme ao ba a bolelago. Re dira boipiletšo bja gore a re ikamogeleng ka seo re lego sona ka go amogela le go ikgantšha ka maleme a rena,” Lerule-Ramakhanya a realo.
