“Na le mmone? Ke a tseba gore ba bangwe ba lena ga ba tsebe Molaodimogolo wa Selete (District
Director). Ke yena yo… ke Mme Nkuzana. Ke yena a re šupago tsela mo Seleteng sa Capricorn Borwa,
selete seo se hlatlogago. Ke leboga lebaka la gore o tlogetše mešomo ya gago go tla go re thekga. Re a
leboga Molaodimogolo. Letšatši la mamohla ke la moswananoši. Ke rena selete sa mathomo mo nageng
sa go swara diphadišano tša mohuta wo… diphadišano tša digotlane. Ke rena mašupatsela! Ba bangwe ba
tla bona ka rena ka gore rena re swara fase,” gwa realo Mtšana Seleka Mabusela yo e lego Acting Deputy
Chief Education Specialist yo a lebanego le Early Childhood Development nakong ya ge a bolela
nepokgolo ya diphadišano tša digotlane lepatlelong la Peter Mokaba la Rugby ka Labone la 25 Mopitlo
(Mei) 2023.
“Ka diphadišano tše, nepokgolo ya rena ke go utolla bokgoni le talente bana esale ba bannyane. Re
dumela go taba ya go aga ngwana ka bobjohle bja gagwe. Ge bana ba bapala, digoba, marapo le mešifa
ya bona di a tielela mme ba gola ba phetše gabotse ba sa tshwenywe ke malwetši. Ge bana ba utolla tšeo
ba di kgonago ka go phadišana goba go thopa difoka, seo se ama maikutlo a bona…ba a thakgala, ba ba
le boitshepo le boikgantšho tšeo di dirago gore ba gole maikutlong. Gape ge bana ba thušana le ba
bangwe gore ba fihlelele katlego, go swana le ka lebelo la go neeletšana dikotana (relay), ba ithuta go
šomišana le ba bangwe. Papadi e nngwe e thuša bana go farologanya mebala ya go fapana. Papadi ya
sepontšhe le kgamelo ya meetse (sponge race) fao bana ba kolobišago sepontšhe mme ba se menela ka
gare ga lepotlelwana go fihla le tlala, e ama bokgoni bjo bo fapanego bjalo ka bokgoni bja go lebanya
sepontšhe le molongwana wa lepotlelo, go mena sepontšhe kudu gore lepotlelwana le tlale ka pela le go
kitimela kgamelong ya meetse go kolobiša sepontšhe gape. Re nagana gore dilo tšeo bana ba di dirago go
dipapadi tša go fapana di ba alela motheo wa go kgwahla le go ba lokišetša bophelo bja sekolo le go aga
boitshepo le moya wa tirišano magareng ga bana.
“Gore barutwana ba rena ba marematlou ba tle ba ipshine ka go goga matorokisi a ditlhora ge ba amogela
dipoelo, motheo wa gona ke wona wo. Go goga matorokisi, go nyakega gore ngwana a sware fase pele…
a be le motheo o maatla wo o ka kgonago go rwala dithuto tša mephatho yeo e latelago. Ge ngwana a se
na motheo wa go kgwahla, a ka se kgone go tla go goga matorokisi ka gore matorokisi a gona a tla wa ka
lebaka la go hloka boitseparelo. Rena re kgopela feela thekgo ya Mna Cairo Sima le balaodi ba didiko
gore lenaneo le le atlege. Ge ba ka se re thekge, re ka se kgone go swara fase. Gape rena re batho ba go
swara fase! Re swara fase ka gore fase ke gona motheong…fase ke gona fao dilo di thomago gona…fao
dilo di ithekgilego gona,” Mabusela a hlaloša ka go realo.
“Bana ba ka, bophelo ga se go phadišana ka mehla fela mamohla re a phadišana gore re bone tšeo le di
kgonago. Ka gona, ge o kitima, o se ke wa emela motho yo mongwe… kitima o mo šie! Hle barutiši,
mafelelong a ngwaga, le fe bana ba dipego tša dilo tšeo ba di kgonago gore ge ba eya pele, ba fao ba yago
ba tsebe gore na ba ka ba hlabolla go dilo dife tšeo ba di kgonago,” Mabusela a realo a laya barutiši.
