POLOKWANE: Moetapele wa mokgatlo wa ActionSA, Herman Mashaba, o šomišitše
kopano ya Mokibelo wa 2 Mopitlo 2026 go beya ActionSA bjalo ka mokgatlo wo o golago
pele ga dikgetho tša mebušo ya selegae. O tsebišitše bahlaolwa ba bahlano ba dimasepala
gammogo le go amogela maloko a go tuma ao a tšwago mekgatlong e mengwe.
Ge a bolela le batšeyakarolo go la Polokwane ka Mokibelo, 2 Mopitlo 2026, Mashaba o rile
mokgatlo o godiša maatla a wona profenseng gomme o ka se be ka thoko dipolitiking tša
bomasepala. “Ke la mathomo historing ya mokgatlo wo re tsebiša bahlaolwa ba dimasepala
ba bahlano ka nako e tee. Ditsebišo tše dingwe di tla latela naga ka moka,” a realo.
Bahlaolwa ba ba tsebišitšwego ba akaretša Thapelo Molepo go masepala wa Polokwane,
Shonbane Mafona wa Molemole, Victor Mothemela wa Selete sa Capricorn, Vhamusanda
Khwara Nengwekhulu wa Collins Chabane le Tonic Manchidi wa Makhuduthamaga.
Mashaba o rile mokgatlo o ikemišeditše go ba bohlokwa diphuthegong tša taolo (coalitions).
“Ka morago ga dikgwedi tše tshela, re nyaka go bona Selete sa Capricorn se se se na yo a ka
bušago ntle le ActionSA,” a realo.
Kopano ye gape e šomile bjalo ka sefala sa go tsebiša maloko a maswa ao a tšwelego go
African National Congress (ANC) le Economic Freedom Fighters (EFF). Gare ga bona go na
le meyara wa maloba wa Greater Tzaneen, Maripe Mangena, modulasetulo wa maloba wa
EFF karolokgethong (sub region) ya Letaba, Simon Mangena, mongwaledi wa maloba wa
profense wa EFF Ramolobela Mokwape le mmoleledi wa maloba wa ANCYL Limpopo,
Mike Ramothwala.
Le ge ActionSA e re go tsena ga yona ke leswao la kgolo, se se bontšha gape go fetogafetoga
ga dipolitiki mo Limpopo ge mekgatlo e itokišetša dikgetho tša 2026.
Mashaba o šomišitše tiragalo ye go sola go palelwa ga mmušo. O latofaditše baetapele ba
dipolitiki ka go itirela lehumo mola badudi ba sa hwetše ditirelo tšeo di lekanego. “Bakgethi
ba lapile ka ditshepišo tšeo di sa phethagatšwego mme ke kgopela bahlaolwa ba mokgatlo wa
rena go beya pele kabo ya meetse, tlhokomelo ya ditsela le tlholo ya mešomo,” a realo.
Mo maemong a profense, Mothemela o rile mokgatlo o šetše o na le makala go ralala le
Limpopo gomme o ikemišeditše go phadišana dikgethong tša dimasepala. “Re na le makala
dileteng ka moka gomme ActionSA e a gola. Re ikemišeditše go buša dimasepala,” a realo.
Molaetša wa mokgatlo o sepedišana le kgatelelo ya setšhaba mabapi le mathata a ditirelo,
kudu metseng ya magaeng moo go sa nago le mathata a magolo a meago le taolo.
Le ge go le bjalo, ActionSA e sa lebane le phadišano ye maatla profenseng yeo e bušwago ke
ANC mola EFF le DA le tšona di sa na le thekgo mafelong a mmalwa.
