“Rena re mo ntweng fela ntwa yeo re e lwago ga se ya go ntšhana madi eupša ya go phutha bohwa bja rena. Ge bohwa bja rena bo sa phuthwe ke rena, re re bo tla phuthwa ke mang? Rena re nyaka gore dilo di loke gore re kgone go gatela pele fela re a bona gore ba bangwe ba leka go re thibela go ya pele. Taba ya gore batho ba re thibele go ya pele e ka se kgonege… re ya pele ka swele. Batho ba go se tšwe Makgabeng ba gana ka tsela ya go tloga mo Noma go ya museamo wa Setlaole kua Early Dawn. Fela tsela e tla ba gona… ga go tselapedi.
“Ka gore mengwaga e ile, ba bangwe ba rena ga re na nako ya go lwala kudu. Ge o lekana le rena, ge o ka lwalalwala ke moka o a hwa ya ba gore go padile. Go bao ba sa tsebego … felo fa re lego gona ke gaNkgeleng. Re be re enwa bjala felo fa o se ke wa go bona ge go le bjalo. Batho ba be ba gobatšwa ke diphafana felo fa. Fela ke a bona gore dilo di fetogile ka gore go na le sekolo gaNkgeleng. Ge o bona sekolo felo fao go bego go tumile ka bjala, go ra gore diphetogo di tlile ebile ga di boele morago. Moreromogolo wa rena ke go bona musiamo wa rena wa Setlaole o šoma gabotse ebile o hlotše dikgoba tša mešomo ka go boloka dilo tša rena tša bohwa. Ka museamo wo, ditlogolwana tša rena di tla tseba gore na borakgolokhukhuabona le rena borakgoloabona re be re phela bjang. Ditlogolo tša rena di tla ithuta ka tšhilo le lwala, tša bona dipitša, meeta, diphafana le merutlo. Ka museamo, ditlogolo tša rena di tla ithuta ka diaparo tšeo borakgoloatšona ba bego ba di apara… ditsiba, dintepa, mabole le tša gabotšona. Di tla ithuta ka diletšo tšo tša rena… dinaka, meropa, dipela, dihlwahlwadi, makope le tše dingwe. Ka museamo, ditlogolo tša rena di tla ithuta ka maho, mafehlo, maselo, diroto, megopo, mahuduo le tše dingwe tše dintši. Na le kwele gore ke boletše ka dilo tše dintši bjang ebile ga se ka fetša go di bala. Felo fa re bolela ka mešomo e mentši kudu ya go diša, go hlokomela le go ruta baeti ka bohwa bja rena…Bohwa bja Makgabeng,” Monyepao a realo a ipshina ka go anegela batho ba gagwe ditaba.
“Ka nako ge ke dutše ke nagana, ke duma gore okare motho a ka swana le Rakgolo Kuane. Rakgolo Kuane o ile a re ka gore ke gotše ebile mafelelong ke tlile go hwa, bokaone ke no itirela lepokisi la poloko. Mokgalabje o ile a itirela lepokisi, a ba a itekanya lona. Batho ba bangwe ba go hloka mapokisi ba ile ba hlokofala fela Rakgolo Kuane a no tšwela pele go phela le ge a be a na le lepokisi la poloko. Mogongwe go dira lepokisi la poloko, wa laetša lehu gore ga o le tšhabe, ke mokgwa o mokaone wa go phela nako e telele,” Monyepao a realo a bolaiša batho go sega.
“Rena re ile ra bona sekolo se thomega ka tlase ga mohlare. Rakgolo wa Setumu, Lekgalaka, o ile a botšiša Papa a re wena Monyepao ka gore o rutegile, o tseba Seisemane ebile o hlogo ya sekolo, na ge legotlo le re ‘šwahla šwahla’, na le reng ka Seisemane? Gonabjale ga esale mehleng yela… ditsela di bulegile. Ka gona, a re gateleng pele, re laetše gore re tšwa Makgabeng ebile ke rena bana ba thaba ya Setlaole,” Monyepao a realo ge a ruma.
