“Mo go leano la kgolo ya ekonomi ya profense ya Mmušo wa Limpopo, šedi e lebišitšwe go makala a
mararo – meepo, temo le boeti. Karolo ya boikarabelo bja kgoro ya gešo ke go hlokomela tše tša
boeti. Batho ba tšeya maeto ka mabaka a mantši a go fapana. Go lekala la boeti, go na le seo se
bitšwago boeti bja dipapadi. Ge go na le papadi lepatlelong la Peter Mokaba, batho ba kgeregela
lepatlelong go tšwa mahlakoreng a go fapana a profense go tla go bogela papadi. Seo ke sona re se
bitšago boeti bja dipapadi ka gore batho bao ba bego ba ka se tle Polokwane, ba etela mo ka lebaka la
gore go na le papadi. Etse batho ba ge ba etla mo, ba diriša dinamelwa, taba yeo e rago gore
bengdinamelwa ba a boelwa ka go ‘kga batho’ kgafetšakgafetša. Ge dinamelwa di emaema bjalo, di
tšhela makhura gomme ba go rekiša makhura le bona ba dira tšhelete. Batho ba beakanya meriri, ba
penta melomo le manala, ba hlatswiša diaparo, ba hlatswa difatanaga ge ba itokišetša go ya
dipapading … ekonomi yona e a gola. Batho ge ba tlile papading, ga ba no bogela papadi ya ba gore
ke moka. Ba reka dijo, dino, diaparo le dintsanantsana tše dingwe tše dintši tšeo di thušago gore
ekonomi e gole,” gwa realo Monama a hlarolla seo ekonomi e lego sona.
“Tumo ya rena bjalo ka mmušo, ke go bona lapa le lengwe le le lengwe le na le seo le ka se jago
letšatši ka letšatši. Le hlwa le bona ge go na le dipapadi… barekiši ba mebileng ba rekiša dilo tša go
fapafapana tšeo di dirago gore ba kgone go ba le sa go ja. Ka gona, re thabile ka kudu ge Polokwane
City e boetše go PSL ka gore seo se ra gore boeti bja dipapadi bo ya go gola. Go sehlopha se re re re a
le leboga e bile re a le lebogiša… le šomile! Monnatia ge a tšwele ka dikgoro, re letetše gore ge a
bowa, a bowe a gokere se sengwe sa go itia dihlaya. Bjalo hleng le botogile le swere phuti… le swere
phala…le swere phalafala. Ge le boetše go PSL, re ka re ‘Mma o tlile, tlala o ny…le’.
“Bjalo ka kgoro yeo e nago le boikarabelo bja go hlohleletša boeti, re ya go le thekga gore le fele le le
mo go liki e kgolo gore le thuše go godiša boeti le ekonomi. Re ya go le thekga ka mekgwa ya go
fapana gammogo le ka mašeleng. Ga ke tsebe gore na mašeleng a gona e tla ba bokae fela ba Boto ya
Boeti ba šogana le taba yeo ge re bolela re ilale. Ba tla re ge ba rumile dipeakanyo tša bona tša boeti
bja dipapadi, ra bolela phatlalatša gore na ke bokae. Fela lehono ga se letšatši la dipolelo eupša la go
keteka katlego e botse. Ka gona, a re ketekeng,” a realo ge a ruma.
