Maitekelo ao a okeditšwego a barutiši, thekgo ya batswadi, maloko a makgotlataolo a dikolo (SGB), bathekgi le dihlopha tše dingwe a a retega. Ke rata go tšeya sebaka se go le leboga ka boikgafo bja lena go bokamoso bja bana ba rena,” gwa realo Molekgotlaphethi.i wa Thuto Limpopo, Mme Mavhungu Lerule-Ramakhanya nakong ya ge a lokolla dipoelo tša marematlou tša 2023 ka Labohlano la 19 Pherekgong (Janaware) 2024 hotelengtsoko ka ntlenyana ga Polokwane.
“Mohlomphegi Tonakgolo le baeng bao ba hlomphegago, re leetong la go fetola dipolelo ka profense ye e botse ya rena ge re bega gore 2024 ke ngwaga wa botswerere go morero wa thuto. Re retolla dilo mme re lebiša sekepe thoko ya mmapaale. Ge re lebelela go tloga ka 2021, re laeditše katlego ya 67% le kaonafalo ka 5% ka 2022 yeo e re išitšego go 72.1%.
Ke tlhompho e kgolo go nna go tsebiša profense gore sehlopha sa 2023 se laeditše kaonafalo e kgolo ya 7.3%. Ke le tsebiša katlego yeo e kaonafetšego ya 79.5% fao ditebogo di swanetšego go lebišwa go sehlopha sa 2023. Ga re keteke feela go hlatloga ka diphesente eupša ke lethabo go nna go bega gore re tlogile maemo a rena a mosela mme re nameletše go tloga maemong a senyane (9) go ya go a bošupa (7).
“Profense e ikgantšha ka mphato wa 2023. Profense e iphadile bobedi ka boleng le dipalo tša dipoelo. Ga go na ka mokgwa o mongwe re ya go tšwela pele go sepela. Re swanetše go tšwela pele go šoma … re tšwele pele go phadima. Ka gona, re rata go kgalema mang goba mang yo a ratago go re emiša goba go re ntšha tseleng gore se ke setimela sa lebelo – tšhaba re feta. Ga se ra lebelela morago … re hlohleletšwa ke mphato wa 2023 gomme ga re na pelaelo ya gore mphato wa 2024 o tla šoma le go feta mo,” ka boitshepo Lerule-Ramakhanya a realo.
“Dilete tša mathomo tše tharo tše dikaone le barutwana ba tšona ke: Maemo a boraro (3) ka barutwana ba 14 583 ke Vhembe East (82.5%); maemo a bobedi (2) ka barutwana ba 5 096 ke Mogalakwena (82.6%) le maemo a pele (1), Mopani West ka 18 078 (83.8%). Didiko tše tharo tša mathomo go ya ka palo ya dipatšhola tšeo di tšweleditšwego ke: maemo a boraro (3) ke Malamulele Central ka 576; maemo a bobedi (2) ke Mankweng ka 649 le maemo a pele (1) ke Pietersburg ka 1 442. Dikolo tše tharo tša mathomo tše dikaonekaone ke: maemo a boraro (3) Taxilla Combined ka dipatšhola tše 197; maemo a bobedi (2) ka dipatšhola tše 258 ke Thengwe Secondary mola maemo a pele (1) ka dipatšhola tše 268 e le Mbilwi Secondary.
Lebebe – barutwana ba bararo ba maemo a pele profenseng go tšwa dikolong tšeo di tlwaelegilego tša setšhaba ke:
|
Selete |
Sediko |
Sekolo |
Maemo |
Palomoka ya Meputso |
Morutwana |
|
Mogalakwena |
Mapela |
Seritarita Secondary |
3 |
1 702 |
Moshabi Jonas Kgakishi |
|
Vhembe West |
Nzhelele West |
Patrick Ramaano Secondary |
2 |
1 712 |
Mavhungu Remonia Mbedzi |
|
Capricorn South |
Pietersburg |
Bokamoso Secondary |
1 |
1 743 |
Nhabiseng Lefophana |
