Badudi ba kgolwa gore Molekgotlaphethiši Lerule-Ramakhanya o šomiša tsošološo ya diofisi tše go goketša badudi ka ge dikgetho di batametše. Se ke ka lebaka la gore projeke ya diofisi tše, yeo e jelego mašeleng a go lekana R30 milione nakong ya ge e thongwa ka 2009, e ile ya tlogwelwa e sa fela ka ngwaga wa 2011.
Diofisi tše di be di swanetše go hlola mešomo go badudi le go ba abela ditirelo tše bohlokwa tša thuto efela tša senywa ke mahodu ka ge di paletšwe ke go fetšwa. Seemo se se tlogetše badudi ba le kgakagenog mengwaga ya go feta 12 mme ba gapeletšega go sepela leeto la go feta 100km go hwetša ditirelo tša thuto. Ba re ga ba dumele gore ditsošološo tše di tla fetšwa, ka ge ba kgolwa gore Molekgotlaphethiši o tšere sephetho sa go feleletša diofisi tše ka ge e le nako ya dikgetho go laetša gore mmušo o a šoma.
“Ke ka lebaka la eng se se sa direga mengwageng ya go feta? Ke eng seo se tla dirago gore projeke ye e se tlogelwe gape ka morago ga dikgetho ka gore ke kgale re lla ka yona efela go se na seo se diregago,” gwa realo Modjadji Raphatsa (44) a ipotšiša.
Ba re go se fele ga diofisi tše go ba amile gampe. “Ngwaga le ngwaga ka kgwedi ya Pherekgong, ba bangwe ba bana ba rena ba swanetše go ya diofising tša selete go ingwadiša go ngwala gape ditlhahlobo tša marematlou le go hwetša ditirelo tše dingwe.
“Ba gapeletšega go tšeya leeto la go ya Polokwane fao e lego kgole. Bao ba hlokago mašeleng a go lefela difatanaga tša bohle, ba a tsielega. Ge nkabe diofisi tše di feditšwe ebile di šoma, bana ba rena ba be ba ka se hlake,” gwa realo George Makgae (55).
Molekgotlaphethiši Lerule-Ramakhanya o tshepišitše gore projeke ya go tsošološa diofisi tše o ile go fela gore bašomi ba kgone go phetha mešomo ya bona.
“Re nyaka go fetša projeke ye ka ge e le bohlolwa kudu go Kgoro le setšhaba. Re hlohleletša batswadi gore ba se ke ba emiša projeke ye ge ba na le dillo,” a realo.
