Maluleke o be a bolela se nakong ya ge a boledišana le badudi ba motse wo ka Sontaga, 14 Moranang 2024. Badudi bao ba be ba ngongorega ka gore mešomo e ba feta ka dihlogong.
Ba re tlhobaboroko ya bona ye kgolo ke tlhokego ya menyetla ya mešomo ka ge bontši bja baswa ba swere mangwalo a dithuto efela ba dutše malapeng a bona ntle le mešomo. Se se gapeletša bontši bja bona gore ba ikhomotše ka madila. Mariah Moloisi (43) o re pelo ya gagwe e kwa bohloko ge a bona baswa ba hloka mešomo.
“Ga re sa tseba gore re direng ka gore mešomo yeo e tlago motseng wa rena e na le mahlo. Bana ba rena ba feleletša ba šomiša diokobatši le madila ka ge ba palelwa ke go kgotlelela go swara mangwalo a thuto efela ba sa šome,” a realo.
Ba bangwe ba re ba bona okare motse wa bona o lebetšwe. Florah Phaswana (38) o re ke kgale ba ipelaetša ka tsela ya mabu yeo e fetago 10km mme e hlokago sekontiri.
“Ke mengwaga re dira lešata ka tsela ye efela go se na seo se diregago. Re tšeya nako e telele go fihla toropong ka lebaka la seemo sa tsela ye mme go ba boima le go feta ge pula e nele,” a realo.
Ba re tlhokego ya meetse le yona ke tlhobaboroko le ge e le gore ba na le dipompi ka malapeng a bona. Gabjale ba re ga ba sa na lebaka la go kgetha dikgethong tšeo di tlago ka ge ba sa hwetše ditirelo tšeo ba di nyakago.
Nakong ya ge Maluleke a ba hlohleletša gore ba kgethe, o rile ba šetše ba le lenaneong la go šogana le dikgetho tša selegae tša 2026 moo ba nyakago go bona badudi ba go tšwa GaMarowe ba emetše badudi ba bona bjalo ka makhanselara masepaleng wa bona.
O re ba swanetše go aga BOSA go wate e nngwe le e nngwe. “Mošomo wa rena ga se go tshepiša batho dilo tšeo re ka se kgonego go di dira. Re dira seo re se tshepišago. Ge re sa phethagatše ditshepišo tša rena, re tlošeng,” a realo.
Maluleke o re ga ba bolele dipolitiki. “Ga re bolele ka dilo tše dintši – re bolela feela ka dilo tšeo di ka fetolago maphelo a batho,” a realo.
