“Yena (OK Matsepe) o ile a dumelela rakgolo go ya le nna Vosloorus ge ke na le mengwaga e mehlano. Ke tsene Sekolo sa Praemari sa Nageng le Sekolo seo se Phagamego sa Kopa, GaMatsepe, mengwaga e mebedi pele ke boela Vosloorus go dira dithuto tša sekolo seo se phagamego mola ka morago ke ile ka itefela dithuto tša godimo tšeo di ilego tša angwa ke dipolitiki tša nako yeo. Ke ka 1974 fao rakgolo Manage Rantho a ilego a nkiša serapeng sa mogoloake go ya go fa OK Matsepe tlhompho ya mafelelo. Ke be ke se na kgopolo ya gore na gabotse ke mang. Go be go bolelwa mo motseng gore o ngwadile dipuku. Ge ke dutše ke gola, batho ba bantši ba mpotšišitše ka yena. Nakong yeo ke be ke tseba gannyane ka yena.
“Oliver Kgadime Matsepe ke Mokgaga’a Mmakubela’a Malope. Ke thaka’a mphato wa Maswene’a Kopa fao a bolotšego ka 1945 ge a thopa bonna. Leina la gagwe la dikwero la ‘Phukubjane’ le tlišitšwe ke ge batswadi ba rena ba be ba lahlegelwa ke bana ba bašemane. Go be go na le tumelo setšhabeng ya go re ka go fa ngwana leina la go se tsebalege bjalo ka Mohlare goba Tekesele, ngwana yoo o na le dibaka tše dibotse tša go phelela batswadi. Ka morago ga go belegwa, lebaka leo e ka bago ngwaga goba go iša fao, OK e be e le segwahlana se sesesane. Gona fao Magagamatala go be go na le ngaka e tšhupša (ya go se diriše ditaola) yeo e bego e hlehlahlehla fao yeo e bego e bitšwa Phukubjane. Rragorena, yoo e bego e le mohlabani yo maatla, o ile a re go Phukubjane: ‘Ge ngwanaka a ka se fole, gageno ke thabeng’. Ke ka lebaka leo OK a bego a bitšwa ka dikwero gore ke ‘Phukubjane,” Manage a hlalosa.
“Ke taba yeo e tsebegago gore OK Matsepe o tšwa lapeng leo go lona go nyalwago mosadi wa go feta yo tee leo nka bolelago ka tiišetšo gore o be a le kwešiša, a le rata le go bona le na le mohola. O bolela ka taba ye mo dipukung tša gagwe mme le yena o nyetše basadi ba go feta yo tee go latela tlwaelo ya batswadi ba gagwe le batswadi ba batswadi ba gagwe. Ka manyami, go nyala basadi ba go feta yo tee ke taba yeo matšatšing a lehono e lebelelwago ka leihlo la bonyatši le dihlong mme legatong la yona go adibeditšwe mekgwa e meswa ya go se tlwaelege. Fela ye ke ngangišano ya letšatši le lengwe.
“Kgadime o be a na le dintlhakemo tšeo a bego a itshwareleditše ka tšona tšeo di akaretšago go hlotla mokgwa wa go anega woo go wona bangwadi ba bego ba bolela ka banna ba go ya makgoweng bjalo ka Jo’burg mme ba boela gae e le maratha ka morago ga go tlogela basadi le bana ba hlaka. Yena o ile a kgetha go iša šedi, go swarelela le go oketša boikgantšho go bogoši, setšo go akaretšwa dikoma, dikoša le kgodišo e botse ya setho ka batho ba botho bja boAforika. Bontši bja dingwalwa tša gagwe bo itlhomile ka gare ga setšaba sa gabo sa Bakopa,” Manage a realo ge a tšwela pele go beya morwarragwe dipataka.
“Ba bangwe ge ba bolela ka OK, ga ba fetše go bolela ka filosofi ya gagwe ya bophelo … ka mokgwa woo a bego a lebelela le go bona bophelo ka gona. Ye nngwe ya dintlhakemo tša gagwe tšeo batho ba ratago go di tsopola go tšwa go Megokgo ya Bjoko ke ya go re: ‘Re llela go phela, re llišwa ke go phela; re llela go phala ba bangwe, re llišwa ke go phalwa ke ba bangwe; re llela tšwelopele, re llišwa ke tšwelopele ka gen nete gona bophelo le le peapeano yeo go yona mang le mang a ratago go ba tšhiya ya letšatši ka letšatši.’
“Go boloka bohwa bja Mokgaga yo, bjalo ka lapa re hlomile OK Matsepe Literature Museum ka nepo ya go ruta le go hlohleletša setšo sa go bala le go ngwala gammogo le go boloka setšo mola re hlohleletša le boeti. Go Unisa, Bakopa ba rata go le leboga. Ka go hlompha mongwadi yo wa dipuku tša Sesotho sa Leboa / Sepedi e lego Kgadime Matsepe, le hlomphile setšhaba sa Bakgaga Bakopa le setho le setšo sa bona. Ka go mo hlompha, le hlomphile setšo sa thari e ntsho gammogo le bangwadi ba maleme a Aforika mo nageng,” Matsepe a realo.
Matsepe o lebogile batho le ditheo tšeo di thušitšego go phagamiša leina le mediro ya OK. Moletlo wo o be o tsenetšwe ke ba lapa la GaMatsepe, go akaretšwa Kgoši Boleu Rammupudu II. Dr Namane Masemola le MEC wa Matlotlo a Profense ya Limpopo, Mna Seaparo Sekoati le bona ba hlomphile moletlo wo ka go ba gona ka sebele.
