MMEGI WA SEIPONE
“Go na le tswalano magareng ga boeti, tikologo le projeke yeo re e thakgolago ya go bjala
mehlare.Baeti ga ba rate mafelo a ditšhila … boeti le matšhila ke dilo tše pedi tšeo di sa
sepelelanego. Baeti ba rata mafelo a go hlweka a matalana ao a laetšago bophelo le moya wa
go ithata. Ga go na motho yo a ka tšeago leeto go ya go bona matšhila fela go na le diketekete
tša batho tšeo di tšeago maeto go ya go bona mafelo a go hlweka. Hle ke a le kgopela
magagešo, a re lahleng mokgwa wo wa go lahla matšhila … mapotlelo, dikotikoti, dipampiri
le diphamphase gohlegohle. Matšhila a a bolaya boeti mola a re hlolela malwetši ka ge a
gogolelwa dinokeng tšeo re nwago meetse a tšona.
“Re dumela gore ge motho a bjala mohlare, motho yoo o bjala bophelo! Ge motho a bjala
mohlare, o bjala semela seo diphoofolo, dinonyana, digagabi le dikhunkhwane di tlilego go
iphediša ka go se ja. Ge o bjala mohlare, o bjala selo seo e tlilego go ba legae go dinonyana,
digagabi, diboko le dikhunkhwane. Ge o bjala mohlare, o bjala sephedi seo se yago go thibela
kgogolego ya mobu gore mobu o tšwele pele go fepa batho. Ge o bjala mohlare, o bjala
dienywa, moriti le mothopo wa dihlare tša go ikalafa. Nepo ya rena ke go bjala mehlare go
tloga mo mošate wa Moletši go ya go fihla Mmakgodu tseleng ya go ya Mogwadi (Dendron).
Ke rata go leboga bao ba ithaopilego go re abela mehlare, kudu Mobidibidi. Ke leboga
thekgo go dimasepala tša rena, Mna Mashalane Morafi go tšwa Masepala wa Polokwane le
Mna Ravhele go tšwa Masepaleng wa Selete sa Capricorn. Gape ke leboga le baithaopi bao
ba re thušago go bjala mehlare ye,” Setumu a realo ka ditebogo.
Mna Mashalane Morafi o rutile batho ka mekgwa ya maleba ya go bjala mohlare. O re
mohlare wo o bjalwago ke Mobidibidi goba Mmaba. Mohlare wo ke wa setšo, wa go
kgotlelela komelelo wo o talafalago ngwaga ka moka. Mohlare wo o kgona go gola go fihla
go 15 methara fao o dirago moriti o mobotse. Medu ya wona e kgona go alafa mokgohlwane.
“Ke thakgetše kudu ge projeke ye e thakgolwa mo Moletši. Gape ke rata go leboga thuto e
botse yeo re e humanego go tšwa go Mna Morafi ya mekgwa ya maleba ya go bjala mehlare.
Ka projeke ye, gape Moletši e tlile go ba lefelo le lebotse. Bahlaloga, projeke e botse še e tlile
ka gae. A re thekgeng projeke ye, re hlokomeleng mehlare ye …re e nošetše. Ke a tseba gore
batho ba bantši ba tla nyaka gore projeke ye e ba fihlele fela ge le ka kopana le bao ba
dikadikago go e adibetša, tlišang mehlare ye mo Moletši ka gore rena re rata projeke ye,” ka
lethabo gwa realo Kgoši Kgabo Moloto III ge a thakgola projeke semmušo.
