Se e be e le karolo ya lesolo la go boela sekolong. Lenaneo le la go ralala le naga ka bophara ke mešomo ya State Information Technology Agency (SITA). Phapoši ye ya diteko e ile go matlafatša dithuto tša barutwana le barutiši ka inthanete yeo e akareditšwego moagong wo. Go rena seo ke go beeletša go bokamoso. Tona Gungubele o re didirišwa tša moago wo di sepedišana le pono ya gagwe ya SITA ya boetapele bja go matlafatša theknolotši mmušong.
“Didirišwa tše ke tša mmakgonthe mme di ile go abela barutwana tšhomišo ya theknolotši ya maemo a godimo. Sešupo se se ile go matlafatša barutwana gore ba oketše tsebo ya bona ya dikhompyutha, ba netefatša gore ba itokišetša 4th Industrial Revolution le ekonomi ya gosasa. Ke kgopela gore le šomiše didirišwa tše gabotse ka gore tshepo ya morutwana yo a hlakago e mo dithutong. Se ke sešupo sa gore morutwana yo mongwe le yo mongwe o na le tokelo ya go hwetša didirišwa tša maleba tša thuto ka gore re sepela dinakong tša theknolotši,” gwa realo Gungubele.
Motlatšamolaodipharephare (DDG) wa motšwaoswere Kgorong ya Thuto mo Limpopo, Ntlhashana Mphahlele, o rile: “Re leboga didirišwa tše tša diteko tša theknolotši. Re tlwaetše go thakgola feela meago ya ditlabakelo tša diteko tša saense. Ka fao, re kwa re thabile kudu mamohla ka go dira bjalo ka laporathori ya ditlabakelo tša theknolotši. Dimpho tše di tla dira gore bana ba rena ba swane le ba baagišani ….tša ba thuša gore ba kgone go sepela le mabaka. Re tshepa gore tiragalo ye ya matlafatšo e ile go fihla le dikolong tše dingwe go ralala le Limpopo,” a realo.
Nepo ya didirišwa tše ke go beeletša kgolong ya dikolo tša maemo a godimo go tša thuto. Morutwana wa Kreiti 10, Tshegofatso Rafapa, o re ba leboga Kgoro ka ge e ba gopotše ka didirišwa tše tše bohlokwa.
“Se ke sešupo sa gore thuto e bohlokwa. Re leetong la 4th Industrial Revolution yeo e nyakago inthanete le theknolotši. Ka ge bontši bja barutwana ba palelwa ke go reka dillathekeng tša go hlalefa, didirišwa tše di ile go re tšwela mohola. Ka tšona re tla kgona go fihlelela tshedimošo ka dilo tšeo di lego gona le tšeo di dirwago ke batho ba bangwe go ralala le lefase,” a realo ka lethabo.
