“Re tlile mo lehono batswadi ba ka go tla go keteka go ba gona ga lena. Ke nyaka go le botša gore le
batho ba bohlokwahlokwa setšhabeng. Ke realo ka gobane ge nkabe e se ka lena, nkabe ba bangwe ba
rena re se gona… ditlogolo le ditlogolwana. Bokgaetšedi le bobuti ba gona ka lebaka la lena. Ge re
bona lena, re opa magoswi, re a le hlompha ka gore naga ye e bile gona ka lebaka la lena. Bjalo
lehono le re mo go tla go le keteka. Ge re tlo tla mo, re be re le mola gaMogošadi, re ile go mmona.
Ba šetše ba laeditše gore o feditše mengwaga e mekaakang. Re re Modimo a mo godiše. Re re
Modimo a le godišeng… le re fepeleng bana… le re fepeleng ditlogolo. Re fele re re ge re tšhalo, re
hwetše bana ba jele motepa… bana ba jele bogobe. Re hwetše bana ba ora mollo.
“Ke bontšhitše ka re le ba bohlokwa batswadi ba ka. Ke ka lebaka leo Tona a beilego letšatši le gore a
tle a bone lena… lena feela batšofadi ba rena go le laetša gore le bohlokwa. Le a ratega mo nageng ka
lebaka la gore ke lena le kgonthišago gore bana ba gola gabotse. Ke lena le kgonthišišago gore bana
ba humana melao ya maleba ka gare ga malapa. Ke lena le kgonthišišago gore bana ba sepela ka
ditsela tšeo di lotegileng ka gore le phetše maloba mme le tseba tše botse le tšeo di sego botse. Le
batho ba bohlokwa batswadi ba ka. Ke rata go gatelela gore Tona o be a ratile go tlo hlwa a na le lena,
a ipshina le lena letšatši ka moka. Fela le ge go le bjalo, ga go felele fao. Go bontšhitšwe ge re le fale
gore go na le bakgekolo bao ba godilego go feta le Mogošadi… ba gona mo motseng. Le gona lena.
Se se ra gore ga se mafelelo gore go be le sebaka sa gore Tona a tle a tle mo. Le ba mošate ba e
hlatseditše gore Tona o swanetše gore a tle a bowe mo… a tle a le bone. A tle a ipshine le lena… a le
botše gore le ratwa bjang,” Cllr Mashego a realo ge a tšwela pele.
“Gape ge nkabe e se ka lena batho ba bagolo, naga ye e be e tla ba le meetlwa, ya hlaba batho. Fela ka
gobane le tseba go kgalemela, bana ba gola gabotse. Ka lebaka la lena, bana ba ba baetapele ba
bakaone ba go kgona go sepetša ditaba. Bana ba tšeya mehlala go lena… ba rutwa ke lena. Ka go
realo, ke fa ke emetše Tona, ke emetše le Meyaraphethiši wa Sekhukhune ka go no re re a le rata ka
moka. Ba gona mo ba Ofisi ya Tonakgolo bao ba hlokometšego gore dinyakwa tša batšofadi di elwa
tlhoko… di a lokišwa. Ke kwele Tate Nchabeleng a re ga se a ka a bona motšofadi wa mo Mphanama
ge ba le mabelong. Tate Nchabeleng, ke nyaka go go kgonthišetša gore batšofadi ba mo ba tšeya
karolo. Go na le mokgekolo yo mongwe mo Mphanama ba re ke Mashienyane Sekgala… ba bangwe
le a mo tseba ke Mmago Dintse kua malaeneng… yo a šiilego bakgekolo ba selete sa Sekhukhune ka
moka. Go ra gore ba bangwe ba go swana naye ba gona mo magareng ga lena. Tate Nchabeleng o
bontšhitše gore le ge o tšofetše, go bohlokwa gore motho a fele a sepelesepela… a rarela le meboto
ye. Go dira bjalo e tla ba e le go ikotlolla, go tiiša marapo a mmele. Re se ke ra phela re dutše fase ka
gore go lapa ga mmele ge motho a dutše a gola, go ba gona. Ke moka go nyakega gore mmele wo o o
gapeletše… o o otlolle, ke moka dilo di tla sepela gabotse. Re a le rata! Halala lena… halala!” Cllr
Mashego a ruma ka go realo ge lešaba le mo kuka ka magoswi.
