MOGALE SEKWELA
POLOKWANE: Molekgotlaphethiši wa Kgoro ya Mešomo ya Setšhaba, Ditsela le Mafarahlahla, Ernest Rachoene, o kgethile Moses Tseli bjalo ka mosepediši wa lebakanyana wa merero ya lekala la Ditsela tša Limpopo (RAL). Se se tla ka morago ga gore Molekgotlaphethiši Rachoene a šwalaganye boto ya maloba ya lekala le ka kgwedi ya Mosegamanye 2024 ka morago ga gore maloko a mararo (3) a tlogele modiro mme se sa hlola gore boto e palelwe ke go fihlelela palo ya go tšeya diphetho.
Rachoene o šwalalantše boto ka ge lekala le le ipofile ka diprojeke tše dintši tšeo di fihlago go mašeleng a R355 milione. Go ya ka bašomi ba RAL, tšhelete ye ya boitlamo e ka ba e baletšwe tlase ka R216 milione.
Diprojeke tše di dirilwe le ge e le gore go na le mathata a mašeleng. Se se fa setšhaba seswantšho se sebe sa gore Kgoro e ka kgona go iša diprojeke setšhabeng le ge go se bjalo. Ge projeke e dumelelwa le go saenelwa, go swanetše go ba go na le mašeleng ao a beetšwego ka thoko go phethagatša projeke yeo.
Rachoene o re Tseli o ile go thuša go beakanya boto le go netefatša gore kabo ya ditirelo e a kaonafala.
“Mosepediši yo o kgethilwe go ya ka karolo ya 49(3) ya molao wa taolo ya tšhomišo ya mašeleng a setšhaba (Public Finance Management Act) ya 1999 mme o ile go lebelela tshepedišo ya RAL nakong ya ge Kgoro e šogana le tshepedišo ya go kgetha boto ye ntshwa,” a realo.
O re o bone go le kaone gore ba be le mosepediši wa lebakanyana lekaleng le. “Bjalo ka Kgoro, re ngwaletše Kgoro ya Mašeleng lengwalo re kgopela tumelelo ya go kgetha mosepediši wa lebakanyana,” a realo.
O re se se ile go dumelela tshepedišo e kaone ya boto ka ge badudi ba letetše kaonafalo ya kabo ya ditirelo, kudu go taba ya ditsela.
“Re leboga nnete ya gore balaodi ba RAL ba re netefaleditše gore ba ile go thekga mosepediši wa lebakanyana yo re mo kgethilego,” a realo.
Mosepediši wa lebakanyana o ile go lebelela tshepedišo ya RAL nakong ya ge Kgoro e hlokola boto e ntshwa.
“Re lokolotše papatšo mme re ipiletša gore batho ba kgethwe go ba karolo ya boto ya RAL,” gwa realo Rachoene ge a ruma.
