PUŠO E LE PALETŠE!

MMEGI WA SEIPONE

POLOKWANE: Bošego bja Labohlano la 19 Mosegamanye e be e le bja go fola bjo bo dumelelago batho go apara ka fao ba ratago. Batho ba be ba di bofile o se ke wa forwa … banna ba feletše ka disutu, dithai le dieta tšela tša go feta lofo ya borotho ka botelele … agenkeke! Bao ba bego ba di bofile go fetišiša ke basadi … ka diroko tšela tše telele tša go gadima seetšeng mola bothakga bo be bo tsokane hlogong fao dituku tša mehutahuta di bego di bofilwe ka mokgwa wola o dirago gore mathaka a se fetše go koba molala. Barutwana ba Sekolo seo se Phagamego sa BBKS tikologong ya Burgersfort ba be ba feletše ka diyunifomo. Lefelo e be e le holo ya Unisa mo Polokwane mme morero e be e le thutophatlhošo ya bohlano ya Dr OK Matsepe.

“Thutophatlhošo ye ga se taba ya go kgantšha eupša bjalo ka yunibesithi re hlompha diponelopele tšeo modiro wa Matsepe o di tšweletšago. Go yunibesithi, Dr OK Matsepe ga se mogale yo a hlokofetšego eupša re sa na le Matsepe ka mehla. Ke ka lebaka leo Senate sa yunibesithi ya gešo se tšerego sephetho sa go mo hlompha ka tikrii ya bongaka ka lebaka la khuetšo yeo modiro wa gagwe o bilego nayo go leleme la Sesotho sa Leboa / Sepedi. Tikrii ye ke go hlompha khuetšo ya gagwe ka gore Dr OK Matsepe o tlogetše mohlala wo o ka se phumogego go dingwalwa tša Sesotho sa Leboa / Sepedi. Baithuti ba bantši ba humane ditikrii tša Masters le Bongaka (PhD) ka go diriša dingwalwa tša Matsepe. Ke ka lebaka leo modiro wa Matsepe o sa swanelago go dumelelwa gore o hwe,” gwa realo Moretšisetara wa Motšwaoeja Unisa, Profesa Mike Sepota, ge a ala morero wa thutophatlhošo.

“Ba bangwe ga ba lemoge gore bontši bja ditaba tšeo Matsepe a ngwadilego ka tšona ke histori ya setšhaba sa gabo sa Bakopa. Bjalo ka motho wa mošate, bontši bja ditaba tšeo a ngwadilego ka tšona o di kwele di phela go tšwa kgorong ya mošate wa gabo ge a be a theeleditše bakgalabje ba bolela ka histori le bophelo bja setšhaba sa gabo. Ka pene ya gagwe Matsepe o a lla … o llela setšhaba sa gabo … o llela bohloko le masetlapelo ao setšhaba sa gabo se phetšego ka gare ga tšona. Pebele ya mathomo e ngwadilwe ka polelosemmotwana ya Bakopa. Mo pukung ya EM Ramaila ya ‘Tša Bophelo bja Moruti Abraham Serote’, Ramaila o laodiša ka fao Serote a ilego a išwa Jeremane go ya go fetolela Pebele go tloga go Sejeremane go ya go Sekopa. Ka letšatši la 10 Mopitlo (Mei) 1864, madira a Maburu le Maswati a ile a gagara setšhaba sa Bakopa fao palo yeo e ka bago seripagare sa setšhaba e ilego ya bolawa kua gabohloko Thabantsho … thaba yeo e nwelego madi a Bakopa. Ye ke histori yeo e sego ya ngwalwa felo ka kholofelo ya gore e tla nyamelela,” gwa realo seboledisegolo sa thutophatlhošo, Profesa Tebogo Maahlamela, nakong ya ge a ala polelo ya gagwe.

“Fela histori ya Bakopa ga se ya felela Thabantsho ka gore OK Matsepe o tšweletša a mangwe a masetlapelo ao setšhaba sa gabo se fetilego go wona. Ka kgwedi ya Pherekgong 1865, setšhaba se sa Bakopa seo se bego se bušwa ke Kgoši Boleu se ile sa arogana ka diripa tše pedi, seripa se sengwe sa leba borwabohlabela se lebile Botšhabelo tikologong ya Middelburg mola se sengwe se šetše Thabantsho. Mo ke fao go hlolegilego setšhaba sa Matsepe le sa Rammupudu bao e lego barwarre bao le nankhomo ba dudišanego le go agišana.

“Boganka, dintwa, dipolayano, bopelompeta, sehlogo le dintwa tšeo di tšwelelago dipukung tša Matsepe ga se ditaba tša boikgopolelo ka moka eupša tše dingwe ke karolo ya ditaba tšeo di diragaletšego setšhaba sa gabo sa Bakopa. Ge a gopola ka fao Maburu a gagarilego setšhaba sa gabo le go se aroganya go tšwa diripa tše pedi, Matsepe o ngwadile sereto seo a se bitšago ‘Pušo e le paletše’. Go sereto se Matsepe o kgalema mmušo wa Maburu ka bogale le ka pefelo gore pušo e paletše mmušo woo o bolayago le go aroganya batho,” a realo monna wa go tšhaba go nkga legano ge a tšwela pele.

Maahlamela o re dingwalwa tša OK Matsepe di humile ka maswetheswethe a ditaba tšeo di kopanyago histori, setšo le bokgabo bja makgethe bjo bo dirago gore dingwalwa tša gagwe e be mohlakamotala wa moswananoši wo o ikgethilego. Dingwalwa tša OK Matsepe ke moepo wo o sa gopego woo go wona mašabašaba a sa ilego go fata tsebo, setšo, meetlo, filosofi le polelo ya go huma ka mantšu a maswa, maina a batho a go segiša, dika le diema tša mehutahuta.

Thutophatlhošo ye e be e tsenetšwe ke Magoši, dikemedi tša Ofisi ya Tonakgolo ya Limpopo, baetapele le dirutegi tša Unisa, dikemedi tša lapa la gaMatsepe, bangwadi le maloko a setšhaba ao a ratago le go thekga setšo, bokgabo, leleme le bongwadi.