“Gona sekhutlong se sa naga ya theko ya godimo, go ya go agwa Yunibesithi ya Bongaka. Khansele e
segetše Tshwane University of Technology (TUT) naga fao yunibesithi e nyakago go aga khamphase
ya yona. Gona sekhutlong seo sa naga, re aga lepatlelo la Kgwelentlatlana (Softball) mola gape re le
leanong la go aga lebala la kolofo. Gape re morerong wa go aga lefelo la marobalo lešokeng la
diphoofolo la Polokwane gore batho ge ba etetše Polokwane, ba kgone go ipshina ka methopo ya
tlhago bjalo ka diphoofolo tša lešoka. Ge motho a le Polokwane, o swanetše go ikhwetša a le
motsemogolo fao a kopanago le tša toropo ka lehlakoreng le tee mola ka lehlakoreng le lengwe a
ikhumana a le kgauswi le tlhago fao a kgonago go bona dimela le diphoofolo tša go fapana tša lešoka
le go kwa melodi ya dinonyana.
“Re nagana gore go agwa ga Sepetlela sa Bogareng sa Limpopo go tla tliša diphetogo tše dingwe tše
dintši mo Motsemogolo wa Polokwane. Re dumela gore sepetlela se ya go goka dingaka tša go
ikgetha go tšwa makaleng a go fapana a maphelo. Re nagana gore bontši bja dingaka tše bo tla tla le
malapa goba di tla kopana le batho le go hloma malapa gona fa gomme di tla nyaka mafelo a bodulo,
ditirelo le dinolofatši tša go fapana. Ntle le mešomo ya lebakanyana yeo e tlago hlolega ge sepetlela
se agwa, re dumela gore ge se feditše go agwa, se tla hlola dikgoba tša mešomo ya ruri tšeo di tlago
thuša bontši bja badudi bao ba nyakago mediro. Go feta fao, ge se thomile go šoma, sepetlela se tla
nyaka dithoto le ditirelo tša go fapana go tšwa go borakgwebo gomme re dumela gore se se tla
matlafatša borakgwebopotlana bao ba tla bago ba aba ditirelo tšro. Peeletšo yeo e dirwago godimo ga
bookelo bjo, ke peeletšo e kgolo go Motsemogolo le profense ya Limpopo. Re dumela gore ka
morago ga go agwa ga bookelo bjo, Polokwane e ka se sa swana le pele. Re lebeletše feela diphetogo
le kgatelopele,” Mpe a ruma ka go realo.
Moletlwana wo o be o tsenetšwe ke Ditona, Dr Joe Phaahla wa Maphelo, Dr Aaron Motsoaledi wa
Merero ya Selegae le Tona ka Ofising ya Presitente yeo e lebeletšego Tekolo le Tlhahlobo
(Monitoring & Evaluation), Khumbudzo Ntshavheni, Tonakgolo ya lebakanyana, Mna Seaparo
Sekoati, MEC wa Dipapadi, Bokgabo le Setšo, Mme Nakedi Kekana, MEC wa Maphelo, Dr Phophi
Ramathuba le bahlankedibagolo ba mmušo wa bosetšhaba le wa profense.
