THOMO NKGADIMA
PRAKTISEER: Mosetsana yo monnyane, Phagamiso Napo (8), o nyaka go phumphanya lefase
ngwaga wo o tlago go la United States of Amerika (USA) phadišanong ya bommasebotsana ba
bannyane. Phagamiso o šetše a emetše naga ya gabo gabotse nakong ya leeto la matšatši a
mane (4) la mmino ka sekepe sa manobonobo (cruise) go tloga Durban go ya Portugese
Islands phadišanong ya Mohumagatšana Afrika Borwa wa mengwaga ya ka tlase ga lesome
(10) ya 2024/025.
Mosetsanyana yo wa Kreiti 3 sekolong sa Laerskool Burgersfort, o thomile tša
bommasebotsana a sa na le mengwaga e meraro. O ratwa ke batho ba bantši go akaretšwa le
barutwana sekolong sa gagwe.
Mmago Phagamiso, Lerato Napo, o re: “Ngwanaka o rata dilo tša bommasebotsana ka pelo
ya gagwe ka moka. O ipshina ka go namela sefaleng, go apara diaparo tše dibotse le go ba
lekgarebjana. Ngwanaka ga a ikgalale gomme ke motho wa go šala ditoro tša gagwe morago
ka ntle le go boela morago. Ge a kopana le batho, ke motho wa go ba le šedi ya go hlokomela
tšeo batho ba di dirago.
“Ke ikgantšha ka yena ka gore le mola sekolong, o šoma ka maatla. Ke maikutlo a mabose
kudu go bona ngwanago a ipeela dinepo gomme a phegelela go fihlelela dinepo tšeo a
ipeetšego tšona,” Mmagwe a realo ka boikgantšho.
“Ke ithutile go rata batho ebile ke a itshepa,” Phagamiso a realo ka boitshepo. O thopile
difoka tše masometharotshela (36) diphadišanong tša go fapana tša bommasebotsana. Ke
modelara wa go kgona go sepetša mmele gomme o tšere karolo go dipontšho tše dintši tša
fešene go akaretšwa le Beke ya Fešene ya Soweto. Ke moemedi (ambassador) wa UD
Fashion House ka morago ga go thopa sefoka sa Boetapele le sa Mofetodi yo Mokaonekaone
wa Dipotšišo (Leadership & Best Interviewee) legorong la gagwe.
“Ke humana tšhušumetšo le tlhohleletšo go tšwa go Mma. Ke yena leswika la ka la motheo le
mohlala wo ke o lebelelago. O dira tšohle go bona gore ke a atlega go fihlelela ditoro tša ka,”
gwa realo Phagamiso ka boitshepo.
“Ke rata gore a atlege go tše tša bommasebotsana. Ke nagana gore a ka bowa le sefoka gae
kua USA. O kgopetše gore o nyaka go ba mmasebotsana ge a keteka matswalo a gagwe a
mengwaga e meraro gomme re ile ra tšea sephetho sa go mo nyakela mohlahli go
kgonthišetša gore o fihlelela ditoro tša gagwe,” gwa realo mmagwe.
“Ke ikgantšha ka Phagamiso. Ke thabile kudu ka gore boitapišo bja gagwe le go šoma ka
maatla di thomile go tšweletša dienywa,” gwa realo mohlahli wa gagwe, Phumzile Khosa.
Bjalo ka kgošigadi yeo e bušago mo nakong ye, Phagamiso o ya go phenkgišana le
bommasebotsana ba bangwe go tšwa lefaseng ka bophara. Mmagwe o kgopela bathekgi ba
ditšhelete go thekga morwedi wa gagwe leetong la gagwe le bohlokwa la go ya sefaleng sa
boditšhabatšhaba fao a ka kgonago go phaphalatša folaga ya naga ya gabo.
Manakana a gagwe go dikgokaganyo tša leago ke: Facebook: Miso Napo mola go Instagram
e le misonapo.
