Yo mongwe wa baoki yoo a nago le tsebo ye e tseneletšego ka motšhene, yo a sa nyakego leina la gagwe le tšweletšwa, o hlalositše gore: “MRI ke motšhene o bohlokwa kudu mo Kgorong ya Maphelo. O kgontšha go lekola ditho tše dintši ntle le go šomiša mahlasedi a bogale (harmful radiation). O šomiša Bohlale bja Maitirelo (Artificial Intelligence) go sekena ditho ka lebelo. Ka theknolotši ya MRI, dinepe ke tša boleng bja godimo. O sekena ka lebelo ebile o re kgotšha go hlahloba balwetši ba bantši ka nako e nnyane. Molwetši o dula ka boiketlo go wona ge a hlahlobja. E kgona go sekena mmele ka moka ka metsotso e seswai (8) goba ye e ka bago e mehlano (5) go fapana ka ditho,” a realo a laetša tsebo ya go tsenelela le boitemogelo.
Molekgotlaphethiši wa Kgoro, Dr Phophi Ramathuba, o re: “Theko ya metšhene ya go swana le wo, e laetša boikgafo bja rena bja go tlabela makala a Kgoro ya Maphelo ka didirišwa tša maleba. Ke ka nepo ya go itokišetša lenaneo le leswa la Inšorense ya Maphelo ya Bosetšhaba (National Health Insurance – NHI). Re na le tshepo ya gore MRI e tlo hlahla diphetho tša kalafo ebile e tlo kaonafatša kalafo ya molwetši ka go utolla bolwetši ka pela,” a realo ka sefahlego sa go tlala lethabo.
Dr Ramathuba o be a laetša a thabile nakong ya ge a laetša boraditaba motšhene wo o moswa. O rile: “Re kgopetše. Bjalo kgopelo ya rena, e phethagetše. Bjalo ye ke nako ya go leboge ditlabakelo tšeo di tlago kaonafatša maphelo a magagaborena. Rena re a leboga,” a realo a inama go laetša gona gore o a leboga.
