Sesi wa Kevin, Elizabeth, o re ba hlakahlakane mme ga se ba hwetša mantšu a go thoba matswalo (counseling) le ge ba dirile dikgopelo.
“Re kgopetše mantšu a go thoba matswalo eupša ra botšwa gore badirelaleago ba ile maikhutšong. Ke na le kgatelelo ya mogopolo mme ke hloka thušo. Ke bone setopo sa moratho wa ka bolotabahu, ka bona le dikgobalo. Le phoofolo ga ya swanela go bolawa ka mokgwa wola,” a realo a rothiša dikeledi.
O re badirelaleago ba tlile lapeng la gagwe efela ga se ba dule lebaka la go feta iri ebile ga se ba bowa gape. “Bjalo ka lapa, re kgopela Kgoro ya Tlhabollo ya Leago gore e re thuše ka go re thoba matswalo ka gore re sa tshwenyegile meboyeng,” a realo.
Elizabeth o re ba ipiletša gape go kgoro ya tsheko gore e sepetše molato wo ka lebelo gore ba kgone go hwetša khutšo. Se ke ka lebaka la gore ba gapeletšega go gopola tiragalo ye šoro ya ge Kevin a bolawa nako le nako ge ba le kgorong ya tsheko.
“Mogononelwa o swanetše go bolela ntloleswiswi. Se se ka se buše Kevin efela go bona mogononelwa a sepela le mebila go ile go roba dipelo tša maloko a lapa la gešo,” a realo.
O re ba ipeletša gape gore go be le dinyakišišo tša go tsenelela go lephodisa le lengwe le le lengwe leo le bego le le tiragalong ka ge go kwagala gore Kevin o bolailwe pele ga maphodisa ao a paletšwego ke go šireletša bophelo bja gagwe.
“Re boditšwe gore ba be ba eme feela okare ba lebeletše kgatišo thelebišeneng. Moratho wa ka nkabe a sa phela ge nkabe maphodisa a dirile mošomo wa wona,” a realo a inamišitše sefahlego.
Mmoleledi wa maphodisa, Colonel Malesela Ledwaba ,o re maphodisa a golegile mogononelwa molatong wa polao, Kenos Mashengete, lefelong la tiragalo mme o gare o tšwelela kgorong ya tsheko ya Nkowankowa.
O tšweletše ka Labobedi, 16 Pherekgong mme molato wa gagwe wa šutišetšwa go Labobedi, 23 Pherekgong go diraa kahlolo.
Mmoleledi wa Kgoro ya Tlhabollo ya Leago, Joshua Kwapa, o ganane le taba ya gore lapa le ga se la hwetša mantšu a go thoba matswalo.
“Modirelaleago wa rena a farafarilwe ke ba bagolo ba gagwe ba etetše lapa le ka Labone, 11 Manthole, go ba kgothatša. Badirelaleago ba rena ba eme komana-madula-e-bapilwe go thuša maloko a lapa le,” a realo.
