GASEKGOPO: Badudi ba dutše ka letšhogo ka morago ga gore mokgekolo yo a bego a
timetše a hwetšwe a hlokofetše. Koko Mamohlao Shai (86) go tšwa GaSekgopo ka ntle ga
Modjadjiskloof o bonagetše la mafelelo mesong ya Labone, 7 Dibatsela 2024.
Ka morago ga gore a se bowe gae, o ile a begwa gore o timetše mme lesolo la go mo nyaka
mafelong ao a felago a eya go wona la laolwa efela a se hwetšwe. Badudi ba ile ba hlatloša
lesolo la go mo nyaka ka go tšeya sephetho sa go tsena lapa ka lapa gammogo le go lekola
dithokgwa ka Laboraro la 13 Dibatsela 2024. Ke moo go hweditšwego setopo sa Koko Shai.
Setopo sa gagwe se hweditšwe ke yo mongwe wa badudi sethokgweng kgauswi le noka ka
morago ga beke ge a timetše. Go hwetšwa ga gagwe go tlogetše badudi le dipotšišo tša go
hloka dikarabo ka ge a hweditšwe ntle le dikgobalo.
Setlogolo sa Koko Shai, Legricia (25) o re ke kgale ba nyakana le Koko wa gagwe go thoma
ka letšatši leo a timetšego ka lona. O ile a felelwa ke mantšu ka morago ga go hwetšwa ga
setopo sa gagwe, mme a re: “Ke lahlegetšwe ke mogwera. Robala ka ka kgotso Koko”.
Badudi ba re ba ipotšiša gore setopo sa gagwe se fihlile bjang sethokgweng. “Go nkga lefotha
mo. Ga go kgonege gore motšofe a hwetšagale sethokgweng a hlokofetše ka morago ga go
timela lebaka la beke. Maphodisa a swanetše go dira dinyakišišo tša go tsenelela ka gore re
thoma go boifela maphelo a batšofe ba rena,” gwa realo modudi (38).
Moetapele wa setšhaba, Prince Marutha o rile: “Ke ka manyami ge re tsebiša setšhaba gore
ka thušo ya badudi, re kgonne go hwetša Koko Shai efela a hlokofetše”.
Sipho Moagi o hlohleleditše badudi gore ba bege maloko a bona ge a timetše nako esale
gona. “Se se diragetšego ga se amogelege ebile se kweša pelo bohloko. Re lakaletša lapa la
ga Shai maatla nakong ye ya boima. Go bohloko go lahlegelwa ke leloko ka tsela ye. Re
tshepa gore maphodisa a tla šoma ka thata go hwetša gore go diregile eng,” a realo.
Mmoleledi wa maphodisa a Limpopo, Colonel Malesela Ledwaba o re ba ngwadišitše molato
wa (inquest) ka morago ga go hwetšwa ga setopo sa motšofe sethokgweng, kgauswi le noka.
“Setopo sa gagwe se hlathilwe ke wa leloko. Seo se hlotšego lehu ga go tsebje ka se sebaka
efela setopo se be se se na dikgobalo tšeo di bonagalago. Dinyakišišo tša morago di ile go
dirwa go lekola gore lehu le hlotšwe ke eng,” a realo.
