MOGALE SEKWELA
BURGERSFORT: Barutwana ba ile ba šala nyanyeng ka morago ga gore dijo le didirišwa tša go ithuta di fišwe. Se se tla ka morago ga gore sekolo sa godimo sa Magale se fišwe mme kgabo ya mollo e je bodulo bja dijo, dikantoro, bokgobapuku le didirišwa tše dingwe tša thuto. Tiragalo ye e diregile motseng wa Maserumule Park ka ntle ga Groblersdal mesong ya Labohlano, 9 Phato 2024.
Seemo se se gapeleditše Molekgotlaphethiši wa Thuto, Mavhungu Lerule-Ramakhanya gore a thakgole leano la tiro la diiri tše 48 go tloga ka Mošupologo, 12 Phato 2024 ka morago ga tiragalo ye. Leano le le tla netefatša gore dithuto di tšwela pele ka ge barutwana ba mphato wa marematlou ba ngwala ditlhahlobo tša bona tša diteko (trial).
“Bjalo ka Kgoro re ile go romela diphapoši tša go thetha le didirišwa tše dingwe, ra hwetša gape le didirišwa tša go ruta le go ithuta gammogo le dijo. Didirišwa tša go gatišwa bjalo ka dipuku di ile go hwetšwa dikolong tša kgauswi ka ge ban aba moth oba ngwathelana hlogwana ya tšie ,” a realo.
Lerule-Ramakhanya o re ga a kwešiše gore ke ka lebaka la eng dikolo tše mmalwa mo profenseng di hlasetšwe ka go fišwa.
O re o ipiletša go dihlopha tša thuto le batšeakarolo gore ba šome ka thata go netefatša gore didirišwa tšeo di senyegilego di tlišwa sekolong se.
“Kgoro e ile go tliša didirišwa ka moka tšeo di hlokegago ka nepo ya rena ya leano la go tsošološa le go netefatša gore setšo sa go ruta le go ithuta se boela sekeng sekolong se,” a tshepiša bjalo.
Lerule-Ramakhanya o hlohleleditše maphodisa gore a šome ka thata go golega bagononelwa. Yo mongwe wa batswadi (46) o tshwenywa ke gore bana ba bona ba ile go palelwa ke go ngwala ditlhahlobo tša bona gabotse.
“Bana ba rena ba ka se kgone go ngwala ba swerwe ke tlala ka gore bontši bja bona ba tšwa malapeng ao a hlakago. Re tshepa gore Kgoro e tla lokiša bothata bjo ka pela,” a realo.
Mmoleledi wa maphodisa a Limpopo, Brigadier Hlulani Mashaba, o re ba nyakišiša molato wa go fiša le tshenyo ya thoto.
“Ga go na yo a golegilwego efela dinyakišišo di tšwela pele,” a realo.
