Ge a bolela ka leeto la gagwe, Mporo o re: “Ke thomile go ruwa dinose ka ngwaga wa 2017 ka morago ga go hwetša tlhahlo yeo e tseneletšego go la Zebediela. Ke šomiša tsebo yeo ya ka go goka dinose gore di tsene ka gare ga mapokisana ao o a bonago fa ao nka rego ke legae la tšona. Ka mo mapokisaneng a, ke gona fao di dirago todi … monate! Monate o dula ka mo mapokisaneng a.
“Ke thomile go tšweletša mamapo/todi ya dinose ka ngwaga wa 2018. Ge ke eya go di rafa, ke apara seaparo se sa tšhireletšo gore di se ke tša ntoma. Ke buna todi ka morago ga dikgwedi tše dingwe le tše dingwe tše nne (4). Ke rafa dinose ka go ntšha mamapo goba todi ka gare ga mapokisana, ke a tšhela ka gare ga sebjana. Ke šomiša motšhene wa theknolotši go hlotla mamapo ao ka a tšhela ka dibjaneng ke moka ka a hlwekiša. Ge ke feditše go a hlwekiša, ke a tšhela ka gare ga dipaketšana goba mapotlelo mme ka rekišetša badudi ba motse wa gešo,” a realo ka boikgantšho.
“Le ge go le bjalo, ga ke na tšwelopelo ebile ke šoma boima ka lebaka la go hlaelela didirišwa tša maleba go swana le disefo, diaparo le meetse. Ke kgopela thušo ka go epelwa meetse le diphahla go swana le mapokisana, disefo (tša go hlwekiša mamapo) le dilo tše dingwe tša maleba tša go ruela dinose,” a realo ka matshwenyego.
“Go ya ka tsebo ya ka, todi ya dinose ke sehlare seo se ka thušago motho ge a swerwe ke mokgohlwane. Gape todi e kgona go thoba le mafahla ebile e fa maatla,” a realo a laetša tsebo le kwešišo ya mošomo wo a o dirago.
Moraswi o re tumo ya gagwe ke gore a kgone go tšweletša todi e ntši a rekišetše mabekenkelengkgoparara le mafelo a mangwe.
Ka letšatši la 20 Mopitlo 2024, lefaseng ka bophara go be go ketekwa Letšatši la Lefase la Dinose (World Bee Day). Go ruwa dinos eke karolo ya temo yeo e bapalago karolo e bohlokwa go ekonomi le maphelong a rena.
