Morutiši yo wa sekolo sa fase sa Mautswi motseng wa Matseke go la Botlokwa ka ntle ga
Polokwane o ile go fetša dibeke tše tshela a le USA mme a bowa ka kgwedi ya Phato.
O ile go ithuta ka boetapele go dipoledišano tša setšhaba (civic engagement) yunibesithing ya
Kansas State go la Manhattan. Ke yo mongwe wa baswa ba 700 go tšwa dinageng tša Aforika
tša borwa bja leganata la Sahara (Sub – Sahara) bao ba tšerego karolo lenaneong le.
Tebogo o boditše Seipone gore o ile a dira dikgopelo tša go tsenela lenaneo le, a kgethwa, a
bitšwa go botšišwa dipotšišo gomme a ba le mahlatse a go hlaolwa. O re o thakgetše ge a
kgonne go tšeya karolo lenaneong le.
“Ke leboga monyetla wo. Ke a tseba gore ye ke kgato ya mathomo ya go lemogwa lefaseng
ka bophara mme ke kgato e bohlokwa ka ge ke lemogilwe ke Young African Leaders
Initiative (YALI). Taba ya go no lemogwa le go hlaolwa gare ga ba bangwe gore o k aba
moetapele wa morero wo o rilego, taba yeo ka noši ke phihlelelo. Go hlaolwa le go romelwa
nageng e nngwe go ya go nyaka bohlale le boitemogelo, yeo ke tlhompho e kgolo go nna. Wo
ke monyetla wo nka se o lebalego gabonolo k age e le maathomomayo,” a realo ka lethabo.
Tebogo o re o holofela gore o tla hwetša tlhahlo le tsebo gore a kgone go ba le ditharollo tša
mathata ao a hlakanago le wona motseng wa gabo le sekolong moo a šomago.
“Monyetla wo o bohlokwa go nna le batho bao ba lego kgauswi le nna, kudu barutwana bao
ke ba rutago ka gore ke tlhohleletšo go bona gore o ka kgona go fihlelela seo o se nyakago.
Ke phihlelelo e kgolo go sekolo le metse ya tikologo gore motho yo a šomago dinagamagae
bjalo ka nna a ka kgona go hwetša monyetla wa go ya Amerika. Taba yeo e fa bana le baswa
ba tikologo yeo mafolofolo le boitshepo bja gore malapa le mafelo ao re tšwago go wona ga
se mapheko a go fihla kae goba kae lefaseng,” ka sefahlego seo se myemyelago Molepo o ile
a realo.
