“Ka ge ke tshepišitše, ke nametše thaba ye go bolela le badimo. Efela pele ke e namela, ke thomile ka go ya nokeng go la Rustenburg, North West, go hlapa senyama,” a realo.
Monyeki o boditše Seipone gore o fihlile Modimolle ka 3mathapama mme a thoma ka go rapela ge a fihla kgorong go ya ka moo thaba ye e nyakago ka gona. “Pula e be e ena mme se e bile sešupo sa gore re amogetšwe,” a realo.
O re o nametše thaba ye a swere dimpho go kgopela badimo gore ba dumelele leeto la Mosegamanye gore le phethege. O re go bile boima go namela thaba ye a kakatletše dimpho efela o kgonne go fihla ntlhoreng ka iri ya bone mathapama. Monyeki o re ba rapetše ntlhoreng ya thaba mme ba phetha ditaelo, ge ba fetša ba fihliša dimpho tšeo.
“Re hlalošitše mabaka a rena ka moka, ra dira le dikgopelo tša rena. Badimo ba thaba ba re arabile ka go dira modumo wa lešata mme se e be e le sešupo sa gore ba amogela kgopelo ya rena ya kgwedi ya Mosegamanye,” a realo.
O re thaba ye e mo laeditše gore a thome kereke ya gagwe yeo e bitšwago Holy City Spiritual Mountain Church of God of Africa mme o tlo e hloma gona mo thabeng ka Mosegamanye.
Ka Labohlano, 28 Mosegamanye 2023, Monyeki gammogo le maloko a gagwe ba ile go sepela ka maoto go tloga Kranskop Toll Plaza go fihla thabeng ye ba opela.
“Ge re goroga dikgorong tša thaba, re ile go robala ka ntle efela ka gare ga ditente mme ra namela thaba ka masa a Mokibelo. Re ile go rapela letšatši ka moka, ra tšeya kano ya rena go thaba ye mosegare. Re ile go kgetha baetapele ba kereke go ya ka dikarolo tša bona. Re ile go robala ntlhoreng ya thaba, ra swara thapelo bošegogare,” gwa realo Monyeki.
Monyeki o re ba ile go rapela gape ka Sontaga mesong, ba phetha ditaelo pele ba ka fologa thaba go boela magaeng a bona.
Thaba ya Modimolle e tsebega bjalo ka thaba ye kgethwa efela ya kotsi, mme bontši bja batho ba e nametše eupša ka manyami ba palelwa ke go e fologa.
