O latofatšwa gape ka go palelwa ke go bolela ka mpho ye ya sefatanaga go khomišene ya go
ikema ya dikgetho (Electoral Commission goba IEC) go ya le ka molao wa go abela
mekgatlo ya dipolitiki ditšhelete (political party funding act).
Maloko a re sefatanaga seo se loketšwe mabone a matala ao a sego molaong mola mootledi
wa sona e le mofaladi.
“O swanetše gore a emele ka thoko mme a dumelele khomišene ya seriti (integrity
commission) ya ANC gore e šogane le dikgonono tše. Re ka se etwe pele ke motho yo a
dikologwago ke bomenetša nakong ya ge a swere maemo a maatla bajalo ka a,” gwa realo
leloko (38).
Ba bangwe ba re ba nyaka go tseba ge e le gore dikgonono tša gore o thwetše mofaladi ke
nnete goba aowa. “Ge e le gore taba yeo ke nnete, gona o swanetše go emela ka thoko. A ka
se thwale mofaladi ka gare ga ANC mola rena maloko a nnete re hloka mešomo,” gwa realo
leloko le lengwe (35).
Efela, Madadzhe o ganeditše ditatofatšo tše mme a re sefatanaga seo se ngwadišitšwe ka
maina a ANC Limpopo.
“Sefatanaga seo e be e se mpho efela se rekilwe ke ANC ka kgwedi ya Pherekgong, 2023. Ge
nka tlošwa maemong a ka gosasa, sefatanaga seo se ile go dula diofising tša ANC. Ga ke na
seo nka bolelago maaka ka sona ebile nka se botše batho maaka,” a realo.
Madadzhe o re o na le ya gagwe BMW X5 yeo a lefelago sekoloto sa yona kgwedi ka
kgwedi. “Ke be ke na le sefatanaga seo ge ke thoma go šoma bjalo ka mongwaledi. Ga se ke
reke sefatanag se sengwe. Motho yo a bolelago mabarebare ao o nyaka gore badudi ba
Limpopo ba dumele gore go na le se sengwe sa go se loke seo ke se dirago,” a realo.
O re ga a na mošomi wa mofaladi sehlopheng sa gagwe sa bašomi. “Go na le batho bao ba
bego ba re tšhošetša ka melaetša ya WhatsApp le SMS gore ba re lebeletše ka ngwaga wa
2022, 2023 le 2024. Mohlomongwe ba paletšwe ke go tsenelela sehlopha sa rena sa
tšhireletšo mme ba bona gore ba dire se,” a realo.
O re o ngwaletše khomišene ya seriti le mongwaledipharephare, Fikile Mbalula, a hlaloša
gore dikgonono tšeo ga se nnete.
