GASEKGOPO: Mosamaria wa kgaogelo, Mabilu Mokwalakwala, ga a rate go amogela dimpho
ka letšatši la gagwe la matswalo. o rata ge a abela barutwana bao ba hlakago diaparo tša sekolo,
mengatwana ya letlhapo le diaparo. O ketekile letšatši la gagwe la matswalo mengwaga ye 59 le
barutwana ba go feta 50 go tšwa dikolong tše 14 motseng wa GaSekgopo ka ntle ga
Modjadjiskloof ka Labohlano la 23 Mopitlo 2025 ka go ba aba diaparo tša sekolo, mengatwana
ya letlhapo gammogo le go ja le bona khekhe ya gagwe.
O re o dira se ka ge a lemogile gore go na le barutwana bao ba yago dikolong ntle le diaparo tša
maleba. Bjal o nyaka gore ba tšwele pele go ya dikolong ntle le go segwa ke barutwana ka bona.
“Ke ile ka ba gare ga seemo sa go hloka diaparo tša sekolo. Ka fao, ga ke rate go bona
barutwana ba sepela tsela yeo ke e sepetšego ka gore e bohloko,” a realo. O re ga a rate go bona
barutwana ba hlaka, mola a na le maatla a go ba thuša. “Ka moka re na le karolo yeo re ka e
ralokago go netefatša gore re thuša barutwana ba rena ka gore ke bona baetapele ba ka moso,” a
realo.
Mokwalakwala o re o dira se go oketša boitshepo bja barutwana gore ba kgone go tšwela pele ba
tsena sekolo moo ba šetšago dithuto tša bona ntle le go tshwenyega ka diaparo. O re o na le
mengwaga ya go feta 14 a keteka letšatši la gagwe la matswalo le barutwana bao ba hlakago.
“Ke setšo sa lapa la gaMokwalakwala go abela batho dimpho ge re keteka. Ke hlohleletša batho
gore ba ntšhale morago ka go thuša bao ba hlakago. Le ge e le thušo e nnyane, e tla kgwatha
bophelo bja motho yo mongwe,” a realo. O re o ile go tšwela pele go thuša barutwana bao ba
hlakago ka gore o rata thuto kudu. Motlogolo wa gagwe, Shabi Mokwalakwala, o re ba thabile
go keteka letšatši la matswalo a gagwe.
“O be a re hlokomela ge re gola mme re leboga gore o sa tšwela pele go hlokomela batho ba
bangwe. Re tshepa gore o tla tšwela pele go thuša batho,” a realo.
Morutwana, Tshepiso Malatji (12), o re ba hweditše papa go Mokwalakwala. “O dula a tšeya
matsapa go netefatša gore re ya sekolong ntle le go boifa go selo. Re leboga tše dibotse tšeo a re
direlago tšona ka gore bontši bja batswadi ba rena ga ba šome,” a realo.
Leloko la lekgotlataolo la sekolo sa tlase sa Kiletša, Motsatsi Ramaremo, o re ba leboga boitapišo bja
Mokwalakwala bja go hlokomela bao ba hlakago.
“Re hloka batho ba go swana le Mokwalakwala motseng wa rena,” a realo.
