O boditše Seipone gore phoofolo ye ya mmala o mosehla ya go bopega, e tla go yena gare ga
mpa ya bošego, ya robala le yena go fihla ka iri ya boraro ka masa.
“E tsena ka lebati la ka morago. Ge e tsena, ke thoma go lora mme ka swarwa ke segateledi.
Nako ye ke swerwe ke segateledi, ke gona e thomago go robala le nna,” a realo ka manyami.
Mokgalabje yo o re ga a bone sefahlego sa phoofolo ye. “Bophelo bja ka bo fetogile kudu ka
gore ke tšofetše… ga ke sa tšwa peu. E tla robala le nna…ya ya le nna… ya ya le nna go fihla
peu ya ka e fela. Ga ke sa tsogelwa … ke tsogelwa feela ge phoofolo ye e fihla. Ge e fetša go
robala le nna ga ke sa tsogelwa. Ka lebaka le, ga go na mosadi yo a nyakago go ratana le
nna,” ka pelobohloko mokgalabje a realo.
“Gape basadi ge ba hwetša gore ga ke tsogelwe, ke moka e tšhaile … ba a sepela. Nka se
kgone go dula ke se na mosadi. Ke mokgalabje mme ga ke nyake go hlokofala ke hloka
molekani,” a realo.
Mokgalabje yo o re phoofolo ye e dira gore a hlake kudu.
“Phoofolo ye e tšeya tšhelete ya ka ya mphiwafela. Ga ke sa ipshina ka selo bophelong … ke
khutša ge ke tagilwe. Ke tšere sephetho sa go nwa madila letšatši ka letšatši gore ke tagwe ka
gore ge ke tagilwe, ga ke kgone go bona phoofolo ye ge e fihla. Ge ke tagilwe, ke gona ke
gona ke robalago.
“Ke ile go dingaka tša setšo le baporofeta efela ga se ka hwetša thušo. Ke nyaka thušo gore
ke tloše phoofolo ye. Ke nyaka bophelo bja ka morago … ke nyaka go phela bjalo ka batho
ba bangwe,” ka go nolega moko a realo.
Ngaka ya setšo, Mamokgadi Selowa, o re phoofolo ye e tlišitšwe go thatafatša bophelo bja
gagwe.
“O swanetše gore a hwetše nkadingala ya go ba le maatla gore e tloše phoofolo ye ka pela ka
gore e ka feletša e tšere bophelo bja gagwe. Dingaka ga di swane ebile ga di lekane ka
maatla. Go swana le dingaka tša sekgowa tšeo di kgonago malwetši ka go fapana, dingaka tša
setšo le tšona di fapana ka dilo tšeo di di kgonago. Yena a a botšiše ka ngaka yeo e kgonago
mathata a go swana le ao a gagwe,” a realo.
